અમદાવાદ, 10 જુન, 2026 : Bomb threat email રાજ્યના મુખ્યમંત્રી કાર્યાલય, અમદાવાદ મ્યુનિસિપલ કોર્પોરેશનની મુખ્ય કચેરી તેમજ આરએસએસના કાર્યાલયને બોમ્બથી ઉડાવી દેવાની ઈ-મેઈલ દ્વારા ધમકી મળી છે. ઈ-મેઈલ દ્વારા 10મી જૂનથી 30મી સપ્ટેમ્બર દરમિયાન અલગ-અલગ મહત્ત્વના સ્થળોએ બોમ્બ બ્લાસ્ટ કરવાની ધમકી મળતાં જ પોલીસ અને સુરક્ષા એજન્સીઓ એક્શનમાં આવી ગઈ છે. કેટલાક તત્વો દ્વારા જુદા-જુદા ઈમેલ આઈડી પરથી મોકલવામાં આવેલા આ ધમકીભર્યા મેઈલમાં સમયનો ઉલ્લેખ કરવામાં આવ્યો છે. જેમાં મુખ્યમંત્રી ઓફિસને બપોરે 1.11 વાગ્યે, અમદાવાદ મ્યુનિસિપલ કોર્પોરેશનની ઓફિસને બપોરે 3.11 વાગ્યે અને આરએસએસની કચેરીને સાંજે 5.11 વાગ્યે બોમ્બ બ્લાસ્ટ કરીને ઉડાવી દેવાનો ઉલ્લેખ કરવામાં આવ્યો છે. આ ધમકી ખાલિસ્તાન નેશનલ આર્મીના નામથી આપી છે. જો કે મુખ્યમંત્રી કાર્યાલયની તપાસ પૂર્ણ થઈ ગઈ છે અને કોઈપણ પ્રકારની શંકાસ્પદ વસ્તુ મળી નથી.
અમદાવાદ મ્યુનિસિપલ કોર્પોરેશનને ઈ-મેઈલ દ્વારા બોમ્બથી ઉડાવી દેવાની ધમકી મળતા એએમસીની દાણાપીઠ સ્થિત મુખ્ય ઓફિસ ખાતે તાત્કાલિક ધોરણે આખી બિલ્ડિંગને ખાલી કરાવી દેવામાં આવી હતી. ધમકીની ગંભીરતાને જોતાં પોલીસ કાફલો, બોમ્બ ડિસ્પોઝલ સ્કવોડ અને ડોગ સ્કવોડ ઘટનાસ્થળે દોડી ગયા હતા. આ હાઈ-ઍલર્ટને પગલે શહેરના તમામ સંવેદનશીલ અને જાહેર સ્થળો પર સુરક્ષા વ્યવસ્થા ગોઠવવામાં આવી છે. કોઈપણ ઘટનાને રોકવા માટે તમામ સ્તરે કડક ચેકિંગ હાથ ધરવામાં આવ્યુ હતુ.
આ મામલે ઉચ્ચ પોલીસ અધિકારીઓ સહિત સાયબર ક્રાઈમની સ્પેશિયલ ટીમ તાત્કાલિક એક્શન મોડમાં આવી ગઈ છે. જે ઈમેલ આઈડી પરથી આ ધમકીભર્યા મેસેજ મોકલવામાં આવ્યા છે, તેના સોર્સ અને IP એડ્રેસને ટ્રેસ કરવા માટે ટેકનિકલ સર્વેલન્સની મદદ લેવામાં આવી રહી છે.
