સોમવારે લોકસભામાં એક રાષ્ટ્ર, એક ચૂંટણી સંબંધિત બે બિલ રજૂ કરાશે

નવી દિલ્હીઃ એક રાષ્ટ્ર-એક ચૂંટણી સંબંધિત બે બિલ સોમવારે લોકસભામાં રજૂ કરવામાં આવનાર છે. કેન્દ્રીય કાયદા મંત્રી અર્જુનરામ મેઘવાલ લોકસભામાં 129મું બંધારણ સંશોધન બિલ અને કેન્દ્રશાસિત પ્રદેશો સંશોધન બિલ રજૂ કરશે.

તાજેતરમાં, સરકારે સમગ્ર દેશમાં એક સાથે ચૂંટણી યોજવા માટે ‘વન નેશન વન ઇલેક્શન’ના પ્રસ્તાવ પર વિચારણા કરવા માટે રચવામાં આવેલી ઉચ્ચ સ્તરીય સમિતિની ભલામણોને સ્વીકારી હતી. પૂર્વ રાષ્ટ્રપતિ રામનાથ કોવિંદની અધ્યક્ષતામાં રચાયેલી ઉચ્ચ સ્તરીય સમિતિએ રાજકીય પક્ષો અને નિષ્ણાતો સહિત તમામ હિતધારકો સાથે વિસ્તૃત ચર્ચા કરી હતી.

એક રાષ્ટ્ર એક ચૂંટણીના સિદ્ધાંતને બે તબક્કામાં લાગુ કરવામાં આવશે. પ્રથમ તબક્કામાં લોકસભા અને વિધાનસભાની ચૂંટણીઓ એક સાથે યોજાશે જ્યારે પંચાયત અને નગરપાલિકા જેવી સ્થાનિક સંસ્થાઓની ચૂંટણી સામાન્ય ચૂંટણીના 100 દિવસની અંદર યોજાશે.