નવી દિલ્હીઃ ભારત સરકારે અમેરિકામાં ભારતીય રાજદૂત વિનય મોહન ક્વાત્રા સામે ખાલિસ્તાની અલગતાવાદી ગુરપતવંત સિંહ પન્નુની તાજેતરની ધમકીને ‘ગંભીરતાથી’ લીધી છે. વિદેશ મંત્રાલયે કહ્યું કે વોશિંગ્ટનમાં અધિકારીઓ સાથે આ મુદ્દો ઉઠાવવામાં આવ્યો છે.
ખાલિસ્તાની અલગતાવાદીઓએ દાવો કર્યો હતો કે ક્વાત્રા કથિત રીતે રશિયન અધિકારીઓના સંપર્કમાં છે, જેઓ યુનાઇટેડ સ્ટેટ્સમાં ખાલિસ્તાની નેટવર્ક્સ પર ભારતીય ગુપ્તચર એજન્સીઓને ઇનપુટ પ્રદાન કરે છે. “જ્યારે પણ આવી ધમકીઓ આપવામાં આવે છે, ત્યારે અમે તેને ખૂબ જ ગંભીરતાથી લઈએ છીએ અને અમેરિકી સરકાર સાથે તેને ઉઠાવીએ છીએ. આ ચોક્કસ કિસ્સામાં પણ, “અમે અમેરિકી સરકાર સમક્ષ આ વાત ઉઠાવી છે અને અમે આશા રાખીએ છીએ કે યુનાઈટેડ સ્ટેટ્સ સરકાર અમારી સુરક્ષાની ચિંતાઓને ગંભીરતાથી લેશે અને પગલાં લેશે.
પૂર્વ વિદેશ સચિવ ક્વાત્રાએ આ વર્ષે ઓગસ્ટમાં તરનજીત સિંહ સંધુની જગ્યાએ યુનાઇટેડ સ્ટેટ્સમાં ભારતના રાજદૂત તરીકેનો કાર્યભાર સંભાળ્યો હતો. ક્વાત્રાની નિમણૂક એવા સમયે થઈ છે જ્યારે ખાલિસ્તાની અલગતાવાદીઓ હિંદુ સમુદાય, હિંદુ ધાર્મિક સ્થળો અને યુએસમાં ભારતીય દૂતાવાસને નિશાન બનાવી રહ્યા છે. કેલિફોર્નિયા અને ન્યૂયોર્ક સહિત અન્ય સ્થળોએ મંદિરોને નુકસાન પહોંચાડવાની ઘટનાઓમાં ખાલિસ્તાનીઓ સામેલ છે. તેઓએ સાન ફ્રાન્સિસ્કોમાં ભારતીય દૂતાવાસમાં આગચંપી અને તોડફોડની ઘટનાઓ પણ કરી હતી.
