દક્ષિણ આફ્રિકામાં હિન્દુ મંદિર ધરાશાયી, ભારતીય મૂળના એક વ્યક્તિ સહિત 4 લોકોના મોત
નવી દિલ્હી: દક્ષિણ આફ્રિકાથી મહત્વપૂર્ણ સમાચાર સામે આવ્યા છે. દક્ષિણ આફ્રિકાના ક્વાઝુલુ-નાતાલ પ્રાંતમાં નિર્માણાધીન ચાર માળનું હિન્દુ મંદિર ધરાશાયી થયું છે. આ અકસ્માતમાં ચાર લોકોના મોત થયા છે. મૃતકોમાં ભારતીય મૂળનો 52 વર્ષનો વ્યક્તિ પણ શામેલ છે.
ઇથેક્વિનીની ઉત્તરે રેડક્લિફમાં એક ઢાળવાળી ટેકરી પર બનેલ ન્યૂ અહોબિલમ ટેમ્પલ ઓફ પ્રોટેક્શનનું વિસ્તરણ થઈ રહ્યું હતું ત્યારે ઇમારતનો એક ભાગ ધરાશાયી થયો.
શરૂઆતના અહેવાલો અનુસાર, કાટમાળ નીચે દટાયેલા કામદારોની ચોક્કસ સંખ્યા હજુ સુધી જાણી શકાઈ નથી. બે લોકોના મોતની પુષ્ટિ થઈ હતી. જોકે, બચાવકર્તાઓએ વધુ બે મૃતદેહ બહાર કાઢ્યા હતા, જેના કારણે મૃત્યુઆંક ચાર થયો હતો. અધિકારીઓએ જણાવ્યું હતું કે ખરાબ હવામાનને કારણે બચાવ અને રાહત પ્રયાસો સ્થગિત કરવામાં આવ્યા હતા.
ભારતીય મૂળના એક વ્યક્તિનું પણ મોત
સ્થાનિક મીડિયાએ અધિકારીઓને ટાંકીને અહેવાલ આપ્યો છે કે ચાર મૃતકોમાંથી એકની ઓળખ વિક્કી જયરાજ પાંડે તરીકે થઈ છે, જે મંદિર ટ્રસ્ટના એક્ઝિક્યુટિવ સભ્ય અને બાંધકામ પ્રોજેક્ટના મેનેજર હતા.
અહેવાલોમાં દાવો કરવામાં આવ્યો છે કે મૃતક, વિક્કી જયરાજ પાંડે, લગભગ બે વર્ષ પહેલાં મંદિરના નિર્માણથી જ તેના વિકાસમાં ખૂબ જ સંકળાયેલા હતા. મંદિર સાથે જોડાયેલી ચેરિટી, ફૂડ ફોર લવના ડિરેક્ટર સંવીર મહારાજે પણ પુષ્ટિ આપી કે માર્યા ગયેલા લોકોમાં પાંડે પણ સામેલ હતા.
