રાષ્ટ્રીય રક્ષા યુનિવર્સિટી ખાતે ‘નેશનલ સેફ સ્પોર્ટ એન્ડ એથ્લેટ સેફગાર્ડિંગ પ્રોગ્રામ’નો પ્રારંભ

• ફ્રાન્સના ઓલિમ્પિક સેન્ટર સાથે સંયુક્ત PhD માટે MoU અને ઓલિમ્પિક રિસર્ચ પુસ્તકનું વિમોચન

ગાંધીનગર, 22 ઑક્ટોબર, 2026 – Rashtriya Raksha University રાષ્ટ્રીય રક્ષા યુનિવર્સિટી (RRU)સ્થિત ઇન્ટરનેશનલ ઓલિમ્પિક કમિટી (IOC) ઓલિમ્પિક સ્ટડીઝ સેન્ટર અંતર્ગત કાર્યરત ‘ભારત સેન્ટર ઑફ ઓલિમ્પિક રિસર્ચ એન્ડ એજ્યુકેશન’ (BCORE) દ્વારા ‘ફાઉન્ડેશન પ્રોગ્રામ ઑન સેફ સ્પોર્ટ એન્ડ એથ્લેટ સેફગાર્ડિંગ’ નો પ્રારંભ કરવામાં આવ્યો હતો.

બુધવારે 21 ઓક્ટોબર 2026ના રોજ યોજાયેલા ઉદ્ઘાટન સમારંભમાં નેશનલ સ્પોર્ટ્સ ફેડરેશન્સ, સેન્ટ્રલ આર્મ્ડ પોલીસ ફોર્સિસ (CAPF), SAI સેન્ટર અને હાઇ-પર્ફોર્મન્સ એકેડમીઓ દ્વારા નામાંકિત રમતવીરો (એથ્લેટ્સ), કોચ અને સ્પોર્ટ્સ એડમિનિસ્ટ્રેટર્સે હાજરી આપી હતી. તેમની સાથે સંશોધકો, સેફગાર્ડિંગ પ્રોફેસનલ્સ અને સ્પોર્ટ્સ મેડિસિન નિષ્ણાતો પણ જોડાયા હતા. ભારતીય રમતગમત ઈકોસિસ્ટમમાં ‘સેફ સ્પોર્ટ’ (સુરક્ષિત રમતગમત) ની પદ્ધતિઓને મજબૂત કરવા માટે આ તમામ ત્રણ દિવસીય નિવાસી કાર્યક્રમ (21 થી 23 ઓક્ટોબર 2026) માટે એકત્રિત થયા છે.

આ ઉદ્ઘાટન સમારંભ BCORE માટે અન્ય બે મહત્ત્વપૂર્ણ સિદ્ધિઓનો પણ સાક્ષી બન્યો હતો:

ફ્રાન્સની યુનિવર્સિટી ઑફ રુએન નોર્મંડીના ‘ઓલિમ્પિક સ્ટડીઝ એન્ડ રિસર્ચ સેન્ટર’ (CEROUEN) સાથે યુનિવર્સિટીના વાઇસ પ્રેસિડેન્ટ ડૉ. ફિલિપની ઉપસ્થિતિમાં MoU પર હસ્તાક્ષર કરવામાં આવ્યા.

પ્રખ્યાત અર્થશાસ્ત્રી અને ઓલિમ્પિક સંશોધક પ્રોફેસર વોલ્ફગેંગ માઇનિંગના મુખ્ય સંપાદન હેઠળ પ્રકાશિત પુસ્તક ‘ઓલિમ્પિક ઇન્ટરસેક્શન્સ: ધ ગેમ્સ એન્ડ ધ ક્રોસરોડ્સ ઑફ ગ્લોબલ રિસર્ચ’ નું વિમોચન કરવામાં આવ્યું.

‘સેફ સ્પોર્ટ’ અને રમતવીરોની સુરક્ષાને IOCના મુખ્ય વ્યૂહાત્મક પ્રાથમિકતા ક્ષેત્રોમાંના એક તરીકે જાહેર કરવામાં આવ્યા છે. આ કાર્યક્રમ જાગરૂકતા, આંતરરાષ્ટ્રીય જ્ઞાનનું આદાન-પ્રદાન અને પ્રાયોગિક શિક્ષણ દ્વારા આ વૈશ્વિક પ્રાથમિકતાને ભારતની રમતગમત સંસ્કૃતિમાં વણી લેવા માટે ડિઝાઇન કરવામાં આવ્યો છે.

ઉદ્ઘાટન સમારંભ

સમારંભમાં BCOREનો પરિચય આપવામાં આવ્યો હતો, જેમાં એન્ટી-ડોપિંગ શિક્ષણ અને સંશોધન, ઓલિમ્પિક આયોજન અને મેગા-સ્પોર્ટિંગ ઈવેન્ટ્સનું યજમાનપદ, ગવર્નન્સ મેટ્રિક્સ તથા સામાજિક વારસા ક્ષેત્રે સંસ્થાઓના દ્રષ્ટિકોણ અને કાર્યને રજૂ કરવામાં આવ્યું હતું. ત્યારબાદ ઓલિમ્પિક શિક્ષણના વૈશ્વિક કેન્દ્ર એવા ગ્રીસ સ્થિત ‘ઇન્ટરનેશનલ ઓલિમ્પિક એકેડમી’ (IOA) ના પ્રમુખ ડૉ. ચારિલાઓસ ત્સોલાકીસનો પ્રેરણાદાયી વીડિયો સંદેશ પ્રદર્શિત કરવામાં આવ્યો હતો.

BCORE ના ડિરેક્ટર ડૉ. ઉત્સવ છાવરેએ કાર્યક્રમ, તેના ઉદ્દેશ્યો અને સહભાગીઓ માટેની આગામી તાલીમ સફરની રૂપરેખા આપી હતી. ઓલિમ્પિઝમ, એથ્લેટ-કેન્દ્રિત રમતગમત અને સેફ સ્પોર્ટ મુવમેન્ટ પરનું મુખ્ય વક્તવ્ય ‘સેફ સ્પોર્ટ ફિલિપાઇન્સ’ના સહ-સ્થાપક અને સેફ સ્પોર્ટ એડવોકેટ સુશ્રી રોઝ મે દ્વારા આપવામાં આવ્યું હતું.

સમારંભમાં સિંગાપોરના હાઇ-પર્ફોર્મન્સ સ્પોર્ટ સાયકોલોજિસ્ટ અને AITF (ભારત)ના સીઇઓ સુશ્રી સંજના કિરણ અને મેડિકલ ડૉક્ટર તથા સ્પોર્ટ્સ મેડિસિન સ્પેશિયાલિસ્ટ ડૉ. ખ્યાતિ પણ ઉપસ્થિત રહ્યા હતા, જેઓ આ ત્રણ દિવસ દરમિયાન સત્રોનું નેતૃત્વ કરનારા નિષ્ણાતોમાં સામેલ છે. આગામી બે દિવસમાં તેમની સાથે અન્ય અગ્રણીઓ જોડાશે: સુશ્રી પ્રજ્ઞા મોહન (ભારતીય ટ્રાયથ્લીટ), પ્રો. મેરી વોએસનર (ઓસ્ટ્રેલિયાની વિક્ટોરિયા યુનિવર્સિટીના IHES ના એક્ટિંગ એસોસિએટ ડિરેક્ટર), સુશ્રી જ્હાન્વી સોનાકિયા (UNESCOના સોશિયલ એન્ડ હ્યુમન સાયન્સના પ્રોગ્રામ આસિસ્ટન્ટ), શ્રી કુણાલ (સંયુક્ત સચિવ, યુવા બાબતો અને રમતગમત મંત્રાલય, ભારત સરકાર), પ્રો. માઇકલ એલ. વાલન (આસિસ્ટન્ટ પ્રોફેસર, ક્રિમિનોલોજી, જિંદાલ ગ્લોબલ લો સ્કૂલ), શ્રી રણજીત બજાજ (સ્થાપક અને ડિરેક્ટર, મિનર્વા એકેડમી ફૂટબોલ અને ક્રિકેટ ક્લબ).

રમતગમત ઈકોસિસ્ટમના તમામ ક્ષેત્રોમાંથી ભાગીદારી

આ સમારંભમાં ભારતની રમતગમત ઈકોસિસ્ટમના દરેક ક્ષેત્રનું પ્રતિનિધિત્વ કરતા વિવિધ જૂથોની સક્રિય ભાગીદારી જોવા મળી હતી. ITBP, CRPF, CISF અને SSB સહિતના કેન્દ્રીય સશસ્ત્ર પોલીસ દળો (CAPF) તેમજ આર્મી સ્પોર્ટ્સ ઇન્સ્ટિટ્યૂટમાંથી એથ્લેટ્સ, કોચ, વહીવટકર્તાઓ અને સહાયક સ્ટાફે હાજરી આપી હતી.

સ્પોર્ટ્સ ઓથોરિટી ઑફ ઇન્ડિયા (SAI) નું પ્રતિનિધિત્વ તેના NCOE ઇમ્ફાલ અને NCOE ગાંધીનગર સહિતના કેન્દ્રો દ્વારા કરવામાં આવ્યું હતું. જ્યારે ઇન્ડિયન કાયાકિંગ એન્ડ કેનોઇંગ એસોસિએશન, આઇસ હોકી એસોસિએશન ઑફ ઇન્ડિયા અને ફેન્સિંગ એસોસિએશન ઑફ ઇન્ડિયા જેવા રાષ્ટ્રીય રમતગમત સંઘો અને એસોસિએશનોએ પણ પોતાના પ્રતિનિધિઓ મોકલ્યા હતા. ગોસ્પોર્ટ્સ ફાઉન્ડેશન, રિલાયન્સ ફાઉન્ડેશન સ્પોર્ટ્સ અને બેડમિન્ટન, જીમનાસ્ટિક્સ, ટેબલ ટેનિસ અને ખો-ખો સહિતની વિવિધ રમતોની એકેડમીના પ્રતિનિધિઓએ ભાગ લીધો હતો. આ ઉપરાંત વિજયી ભારત ફાઉન્ડેશન (VBF) ની ટીમ અને VBF ના હાઇ પર્ફોર્મન્સ ડિરેક્ટર શ્રી એરિક હોલિંગ્સવર્થ પણ ઉપસ્થિત રહ્યા હતા.

IIT બોમ્બે, BRAC યુનિવર્સિટી (બાંગ્લાદેશ), MFP સાયકોલોજી કન્સલ્ટિંગ અને અમદાવાદ એજ્યુકેશન સોસાયટી જેવી સંસ્થાઓના સંશોધકો, શિક્ષણવિદો અને સ્પોર્ટ સાયકોલોજી તથા સ્પોર્ટ્સ સાયન્સના વ્યાવસાયિકોએ પણ હાજરી આપી.

ફ્રાન્સની યુનિવર્સિટી ઑફ રુએન નોર્મંડીના CEROUEN સાથે MoU

BCORE, RRU અને ફ્રાન્સની યુનિવર્સિટી ઑફ રુએન નોર્મંડીના ઓલિમ્પિક સ્ટડીઝ એન્ડ રિસર્ચ સેન્ટર (CEROUEN) વચ્ચે વર્ચ્યુઅલ માધ્યમથી MoU સાઇન કરવામાં આવ્યા હતા. 2023માં સ્થપાયેલું અને IOC દ્વારા સત્તાવાર રીતે માન્યતા પ્રાપ્ત CEROUEN એ ઓલિમ્પિક સંશોધન અને શિક્ષણ માટે સમર્પિત કેન્દ્ર છે. આ કરાર વખતે CEROUEN ના પ્રતિનિધિઓ ઓનલાઇન જોડાયા હતા, જ્યારે ડૉ. ઉત્સવ છાવરેએ આ ભાગીદારી અંગે સભાને માહિતગાર કરી હતી.

‘ઓલિમ્પિક ઇન્ટરસેક્શન્સ’ પુસ્તકનું વિમોચન

BCORE દ્વારા વોલ્ફગેંગ માઇનિંગ, બિમલ એન. પટેલ, ગૌરવ સિંહ કુશવાહા અને ઉત્સવ છાવરે દ્વારા સંપાદિત ‘ઓલિમ્પિક ઇન્ટરસેક્શન્સ: ધ ગેમ્સ એન્ડ ધ ક્રોસરોડ્સ ઑફ ગ્લોબલ રિસર્ચ’ પુસ્તકનું પણ વિમોચન કરવામાં આવ્યું હતું. આ પુસ્તકમાં 27 થી 30 જાન્યુઆરી 2025 દરમિયાન RRU ખાતે BCORE દ્વારા યોજાયેલી ભારતની ‘પ્રથમ ઇન્ટરનેશનલ ઓલિમ્પિક રિસર્ચ કોન્ફરન્સ’ની કાર્યવાહી રજૂ કરવામાં આવી છે.

આ પણ વાંચોઃ રાષ્ટ્રીય રક્ષા યુનિવર્સિટી દ્વારા પોલીસ સ્મૃતિ દિવસ 2026ની ઉજવણી