બેંગકોક: માર્ચમાં ચીનની નિકાસ વાર્ષિક ધોરણે 12.4 ટકા વધી છે. આ જ સમયગાળા દરમિયાન, આયાતમાં 4.3 ટકાનો ઘટાડો થયો છે. ચીનથી આયાત થતા માલ પર અમેરિકા દ્વારા ડ્યુટીમાં વધારા વચ્ચે સરકારે સોમવારે આ માહિતી આપી હતી.
વિશ્વની બીજી સૌથી મોટી અર્થવ્યવસ્થામાંથી નિકાસ 2025 ના પ્રથમ ત્રણ મહિના (જાન્યુઆરી-માર્ચ) માં વાર્ષિક ધોરણે 5.8 ટકા વધી હતી, જ્યારે આયાતમાં સાત ટકાનો ઘટાડો થયો હતો. માર્ચ મહિનામાં ચીનનો અમેરિકા સાથેનો વેપાર સરપ્લસ 27.6 બિલિયન ડોલર હતો, જ્યારે તેની નિકાસમાં 4.5 ટકાનો વધારો થયો હતો.
વર્ષના પ્રથમ ત્રિમાસિક ગાળા (જાન્યુઆરી-માર્ચ)માં ચીનનો અમેરિકા સાથેનો વેપાર સરપ્લસ 76.6 બિલિયન ડોલર હતો. અમેરિકાના રાષ્ટ્રપતિ ડોનાલ્ડ ટ્રમ્પની વેપાર નીતિઓમાં તાજેતરના સુધારા મુજબ, ચીન અમેરિકામાં થતી મોટાભાગની નિકાસ પર 145 ટકા ડ્યુટીનો સામનો કરી રહ્યું છે.
કસ્ટમ્સ વહીવટીતંત્રના પ્રવક્તાએ જણાવ્યું હતું કે ચીન “જટિલ અને ગંભીર પરિસ્થિતિ”નો સામનો કરી રહ્યું છે પરંતુ તે હાર માનશે નહીં. તેમણે ચીનના વિવિધ નિકાસ વિકલ્પો અને વિશાળ સ્થાનિક બજાર તરફ ઈશારો કરતા આ વાત કહી.
