યુદ્ધો ફક્ત શસ્ત્રોથી જ નહીં, પરંતુ શિસ્ત, મનોબળ અને સતત તૈયારીથી જીતાય છેઃ રાજનાથસિંહ

• ભુજ આર્મી કેમ્પમાં જવાનો સાથે રક્ષામંત્રીએ દશેરા પર્વની ઊજવણી કરી,
• સંરક્ષણ મંત્રીએ કચ્છની ધરતીને દેશના સાહસની મિસાલ ગણાવી,
• સૈનિકોને સતત તાલીમ આપવા, નવી તકનીકો અપનાવવા અને દરેક પરિસ્થિતિ માટે તૈયાર રહેવાનો આગ્રહ કર્યો

ભૂજઃ સંરક્ષણ મંત્રી રાજનાથસિંહ આજે વિજયાદશમીની પૂર્વસંધ્યાએ ભુજમાં સશસ્ત્ર દળોના જવાનો સાથે દશેરા પર્વની ઊજવણીમાં સહભાગી બન્યા હતા. આ પ્રસંગે તેમણે વિશ્વના ઝડપથી બદલાતા સ્વરૂપ અને દિવસેને દિવસે ઉભરી રહેલા જટિલ પડકારો પર પ્રકાશ પાડ્યો હતો. સંરક્ષણ મંત્રી રાજનાથ સિંહે કહ્યું, આ ઝડપથી બદલાતા યુગમાં, ટેકનોલોજીનું સ્વરૂપ સતત વિકસિત થઈ રહ્યું છે. અગાઉ જેને આધુનિક ટેકનોલોજી માનવામાં આવતી હતી તે ઝડપથી જૂની બની રહી છે. યુદ્ધો ફક્ત શસ્ત્રોથી જ નહીં, પરંતુ શિસ્ત, મનોબળ અને સતત તૈયારીથી જીતાય છે.

તેમણે ભારપૂર્વક જણાવ્યું હતું કે પરંપરાગત જોખમો હજુ પણ છે, પરંતુ આતંકવાદ, સાયબર હુમલા, ડ્રોન યુદ્ધ અને ઈન્ફોર્મેશન વોર જેવા નવા પડકારોએ બહુપરીમાણીય જોખમોમાં વધારો કર્યો છે. આનો સામનો ફક્ત શસ્ત્રોથી કરી શકાતો નથી. માનસિક શક્તિ, અદ્યતન જ્ઞાન અને ઝડપી અનુકૂલનક્ષમતા પણ એટલી જ મહત્વપૂર્ણ છે.

વિજયાદશમીની શુભેચ્છા પાઠવતા, સંરક્ષણ મંત્રીએ તેને અનિષ્ટ પર સારા, અસત્ય પર સત્ય અને અન્યાય પર ન્યાયના વિજયનું પ્રતીક ગણાવ્યું. તેમણે ભુજમાં સૈનિકો વચ્ચે આ પ્રસંગ ઉજવવાનો પોતાનું સૌભાગ્ય વ્યક્ત કર્યુ, જે તેમના સાહસ અને સ્થિતિસ્થાપકતા માટે જાણીતા છે. સંરક્ષણ મંત્રીએ સૈનિકોને સતત તાલીમ આપવા, નવી તકનીકો અપનાવવા અને દરેક પરિસ્થિતિ માટે તૈયાર રહેવાનો આગ્રહ કર્યો હતો. તેમણે કહ્યું કે, “યુદ્ધો ફક્ત શસ્ત્રોથી જ નહીં, પરંતુ શિસ્ત, મનોબળ અને સતત તૈયારીથી જીતાય છે. નવી તકનીકો અપનાવો, તાલીમને તમારા રોજિંદી દિનચર્યાનો અભિન્ન ભાગ બનાવો અને દરેક પરિસ્થિતિ માટે પોતાને તૈયાર રાખો. આજના વિશ્વમાં, અજય શક્તિ એવી છે જે સતત શીખે છે અને નવા પડકારોનો સામનો કરે છે.”

તેમણે સૈનિકોને ખાતરી આપી કે સરકાર તેમના કલ્યાણ, સશસ્ત્ર દળોના આધુનિકીકરણ, નિવૃત્ત સૈનિકોના સન્માન અને તેમના પરિવારોની સુરક્ષા માટે સંપૂર્ણપણે પ્રતિબદ્ધ છે. તેમણે પુનરોચ્ચાર કર્યો, “આપણા સૈનિકોનું કલ્યાણ સર્વોપરી છે.

સંરક્ષણ મંત્રીએ ભારપૂર્વક જણાવ્યું હતું કે, “મજબૂત, આત્મનિર્ભર અને વિકસિત ભારતનું સ્વપ્ન આપણા સૈનિકોના ખભા પર છે. તેમનું સમર્પણ અને બલિદાન જ આ સ્વપ્નને દરરોજ વાસ્તવિકતા બનાવી રહ્યું છે. 21મી સદીને ભારતનો યુગ ગણાવતા શ્રી રાજનાથ સિંહે કહ્યું કે પ્રધાનમંત્રી શ્રી નરેન્દ્ર મોદીના નેતૃત્વમાં દેશ સંરક્ષણ ક્ષેત્રમાં ઝડપથી આત્મનિર્ભરતા તરફ આગળ વધી રહ્યો છે. તેમણે વિશ્વાસ વ્યક્ત કર્યો કે સશસ્ત્ર દળોની પ્રતિબદ્ધતાથી ભારત ટૂંક સમયમાં વિશ્વની શ્રેષ્ઠ સેનાઓમાંની એક બનશે.

રાજનાથ સિંહે ભૂજ અને કચ્છની ભૂમિને આદરાંજલિ આપી, તેને માત્ર ભૌગોલિક સ્થાન જ નહીં, પરંતુ ભાવના અને હિંમતની ગાથા ગણાવી હતી. 1971ના યુદ્ધ અને 1999ના કારગિલ સંઘર્ષ દરમિયાન દર્શાવેલ બહાદુરી અને 2001ના ભૂકંપ પછી બતાવેલ સ્થિતિસ્થાપકતાને યાદ કરતાં તેમણે કહ્યું કે ભૂજ રાખમાંથી ઉગેલા પૌરાણિક ફોનિક્સ પક્ષીની ભાવનાનું ઉદાહરણ આપે છે. તેમણે કહ્યું “કચ્છની ભૂમિ તેના લોકો અને સૈનિકોની બહાદુરી અને અદમ્ય હિંમતનું પ્રતિનિધિત્વ કરે છે.

આ કાર્યક્રમમાં આર્મી ચીફ જનરલ ઉપેન્દ્ર દ્વિવેદી, સધર્ન આર્મી કમાન્ડના જનરલ ઓફિસર કમાન્ડિંગ ઇન ચીફ લેફ્ટનન્ટ જનરલ ધીરજ સેઠ અને 12મી કોર્પ્સના કોર કમાન્ડર લેફ્ટનન્ટ જનરલ આદિત્ય વિક્રમ સિંહ રાઠી પણ ઉપસ્થિત હતા.