દિલ્હીના સર્વાંગી વિકાસ અને લોકોના જીવનને સુધારવામાં કોઈ કસર છોડીશું નહીં: નરેન્દ્ર મોદી
નવી દિલ્હીઃ દિલ્હી ચૂંટણી પરિણામો પર વડા પ્રધાન નરેન્દ્ર મોદીએ સોશિયલ મીડિયા ઉપર પોસ્ટ કરીને જણાવ્યું હતું કે, લોકોની શક્તિ સર્વોચ્ચ છે! વિકાસ જીત્યો, સુશાસન જીત્યું. ભાજપને ઐતિહાસિક વિજય અપાવવા બદલ દિલ્હીના મારા બધા ભાઈઓ અને બહેનોને મારા વંદન અને અભિનંદન! તમે મને આપેલા પુષ્કળ આશીર્વાદ અને પ્રેમ માટે હું તમારા બધાનો ખૂબ ખૂબ આભારી છું. દિલ્હીના સર્વાંગી વિકાસ અને લોકોના જીવનને સુધારવા માટે અમે કોઈ કસર છોડીશું નહીં; આ અમારી ગેરંટી છે. આ સાથે, અમે એ પણ સુનિશ્ચિત કરીશું કે દિલ્હી વિકસિત ભારતના નિર્માણમાં મહત્વપૂર્ણ ભૂમિકા ભજવે. મને મારા બધા ભાજપ કાર્યકરો પર ખૂબ ગર્વ છે જેમણે આ પ્રચંડ જનાદેશ માટે દિવસ-રાત મહેનત કરી. હવે અમે અમારા દિલ્હીવાસીઓની સેવા વધુ મજબૂતીથી કરવા માટે સમર્પિત રહીશું.
દિલ્હી ચૂંટણી પરિણામો પર ગ્વાલિયરમાં કેન્દ્રીય મંત્રી જ્યોતિરાદિત્ય એમ. સિંધિયાએ જણાવ્યું હતું કે, “પીએમ નરેન્દ્ર મોદીના નેતૃત્વમાં, ભાજપ દિલ્હીમાં સરકાર બનાવી રહી છે… દિલ્હીના લોકોએ ઉભા થઈને ભાજપને આશીર્વાદ આપ્યા છે. હવે AAPનો જવાનો સમય આવી ગયો છે.”
ઉત્તર પ્રદેશના સીએમ યોગી આદિત્યનાથે કહ્યું કે, “દિલ્હી વિધાનસભા ચૂંટણી અને મિલ્કીપુર પેટાચૂંટણીના પરિણામોએ જુઠ્ઠાણા અને લૂંટની રાજનીતિ પર પૂર્ણવિરામ મૂકી દીધું છે. આ છેલ્લા 11 વર્ષથી પીએમ મોદીના નેતૃત્વમાં થયેલા વિકાસ કાર્યોનો વિજય છે. હું દિલ્હીમાં જીતેલા તમામ ઉમેદવારોને અભિનંદન આપું છું. હું પીએમ મોદી, ભાજપ પ્રમુખ જેપી નડ્ડા, કેન્દ્રીય ગૃહમંત્રી અમિત શાહને 2.5 દાયકાના અંતરાલ પછી ભાજપને સત્તામાં પાછું લાવવા બદલ અભિનંદન આપું છું…”
રાજસ્થાનના સીએમ ભજનલાલ શર્માએ કહ્યું કે “લોકોને પીએમ નરેન્દ્ર મોદીમાં વિશ્વાસ છે કારણ કે પીએમ મોદી જે કહે છે તે કરે છે. દિલ્હીના લોકોને વિશ્વાસ હતો કે ડબલ એન્જિન સરકાર તેમનો વિકાસ સુનિશ્ચિત કરશે, તેથી તેમણે ઐતિહાસિક બહુમતી સાથે ભાજપ સરકાર બનાવી. હું પીએમ મોદી અને દિલ્હીના લોકોને અભિનંદન આપવા માંગુ છું…”
દિલ્હી ચૂંટણી પરિણામો પર, ભાજપના સાંસદ બાંસુરી સ્વરાજે કહ્યું કે “આ ઐતિહાસિક જીત માટે અમે દિલ્હીના લોકોનો આભાર માનવા માંગીએ છીએ… લોકોએ પીએમ મોદીની ગેરંટીમાં વિશ્વાસ દર્શાવ્યો છે… અમને ટેકો આપવા બદલ અમે બધા લોકોનો આભાર માનવા માંગીએ છીએ… અમે તેમનો વિશ્વાસ જાળવી રાખીશું…”
