લખનૌ: ઉત્તર પ્રદેશના અનેક જિલ્લાઓમાં ધુમ્મસના કારણે માર્ગ અકસ્માતો થયા છે. અત્યાર સુધીમાં 14 લોકોએ જીવ ગુમાવ્યા છે, અને ઘણા લોકો ઘાયલ થયા છે. મથુરા, બાગપત, ઉન્નાવ અને બસ્તીમાં ધુમ્મસના કારણે અનેક વાહનો અકસ્માતનો ભોગ બન્યા છે.
મથુરામાં અકસ્માતમાં અનેક વાહનો અથડાયા, 4 લોકોના મોત
યમુના એક્સપ્રેસ વેના આગ્રા-નોઈડા લેન પર ગાઢ ધુમ્મસમાં ઘણી ઝડપે દોડી રહેલા અનેક વાહનો એકબીજા સાથે અથડાયા હતા. સાત બસો અને બે કારમાં આગ લાગી ગઈ હતી. ઘણા લોકો વાહનોની અંદર ફસાઈ ગયા હતા, જ્યારે અન્ય લોકોએ પોતાનો જીવ બચાવવા માટે બસોમાંથી કૂદી પડ્યા હતા. અત્યાર સુધીમાં ચાર લોકોના મોતની પુષ્ટિ થઈ છે.
બે ડઝનથી વધુ ઘાયલોને હોસ્પિટલમાં દાખલ કરવામાં આવ્યા છે. મૃતકોમાંથી બેની ઓળખ થઈ ગઈ છે. મુખ્યમંત્રી યોગી આદિત્યનાથે આ હૃદયદ્રાવક ઘટનાની નોંધ લીધી છે. તેમણે અધિકારીઓને મૃતકોના પરિવારજનોને 5 લાખ રૂપિયાની સહાય અને ઘાયલોને સારી સારવાર આપવા સૂચના આપી છે.
ઉન્નાવમાં કાર પથ્થર સાથે અથડાતાં ચાર લોકોના મોત
સવારે લગભગ 6 વાગ્યે ઉન્નાવમાં આગ્રા-લખનૌ એક્સપ્રેસ વે પર 100 કિમી પ્રતિ કલાકની ઝડપે દોડી રહેલી ફોર્ચ્યુનર કાર બાંગરમાઉ વિસ્તારમાં રનવે પર મૂકેલા એક પથ્થર સાથે અથડાઈ અને પલટી ગઈ. ટક્કર એટલી જોરદાર હતી કે કારના બધા એરબેગ ખુલી ગયા.
આ અકસ્માતમાં કાર ચલાવતા યુવાન સહિત ચાર લોકોના મોત થયા હતા. કારચાલક ધુમ્મસમાં ઝોકું ખાઈ ગયો હોવાની શંકા છે. સાત મિનિટ પછી પોલીસ આવી, કારમાં ફસાયેલા લોકોને બહાર કાઢ્યા અને CHC લઈ ગયા. ડૉક્ટરે તે બધાને મૃત જાહેર કર્યા.
બસ્તીમાં બસ અને ટ્રક વચ્ચે ટક્કર, ચારના મોત
સંત કબીર નગરથી યાત્રાધામ અજમેર જઈ રહેલી એક ખાનગી પેસેન્જર બસ એક ટ્રક સાથે અથડાઈ ગઈ. જેમાં ચાર મુસાફરોના ઘટનાસ્થળે જ મોત થયા અને 20 થી વધુ ઘાયલ થયા.
ઘાયલોમાંથી ઘણાની હાલત ગંભીર હોવાનું જાણવા મળી રહ્યું છે. આ અકસ્માત સોમવારે મધ્યરાત્રિની આસપાસ કોતવાલી બસ્તીમાં બડેવન ચાર રસ્તા પાસે થયો હતો.
બાગપતમાં કાર હિંડોન નદીમાં પડી, હેડ કોન્સ્ટેબલ સહિત બે લોકોના મોત
મેરઠમાં દરોડા પાડીને પરત ફરતી વખતે, એક કાર બલાની પુલ પરથી હિંડોન નદીમાં ખાબકી હતી. જેમાં હેડ કોન્સ્ટેબલ સહિત બે લોકોના મોત થયા હતા, જ્યારે કોન્સ્ટેબલ સહિત ત્રણ લોકો ઘાયલ થયા હતા.
જ્યારે બલાઇની અને સિંઘાવલી આહિર પોલીસ સ્ટેશનની પોલીસ ઘટનાસ્થળે પહોંચી, ત્યારે કાર હિંડોન નદીના એક છેડે ક્ષતિગ્રસ્ત મળી આવી. પોલીસકર્મીઓ અને અન્ય લોકોને કારમાંથી બહાર કાઢીને નર્સિંગ હોમમાં લઈ જવામાં આવ્યા, જ્યાં ડોક્ટરોએ રાહુલ અને અજરુદ્દીનને મૃત જાહેર કર્યા.
