કેવડિયા-એકતાનગર, 23 સપ્ટેમ્બર,2026 : 72nd National Film Awards ભારતના રાષ્ટ્રપતિ શ્રીમતી દ્રૌપદી મુર્મુએ આજે 72 માં રાષ્ટ્રીય ફિલ્મ પુરસ્કારો એનાયત કર્યા અને તમામ પુરસ્કાર વિજેતાઓને તેમની પ્રતિભા, સમર્પણ અને સખત પરિશ્રમ માટે અભિનંદન પાઠવ્યા. તેમણે કહ્યું કે ફિલ્મ નિર્માણ એ એક સહયોગી પ્રયાસ છે અને એવોર્ડ વિજેતાઓને વિનંતી કરી કે તેઓ તેમની ટીમના દરેક સભ્ય સુધી તેમની પ્રશંસા પહોંચાડે જેમના યોગદાનથી એવોર્ડ વિજેતા ફિલ્મો શક્ય બની છે.
રાષ્ટ્રપતિએ કહ્યું કે ભારતીય સિનેમા દેશની વિવિધ ભાષાઓ, પરંપરાઓ, આકાંક્ષાઓ અને સંઘર્ષોને પ્રતિબિંબિત કરે છે. તેમણે રાષ્ટ્રીય ફિલ્મ પુરસ્કારોના સ્થળ તરીકે એકતા નગરની પસંદગીની પ્રશંસા કરી, જે ભારતની સાંસ્કૃતિક અને રાષ્ટ્રીય એકતાનું પ્રતીક છે.
સર્જનાત્મક અર્થતંત્રમાં ગૌરવ અને સામાજિક સુરક્ષા માટે આહ્વાન કરતા રાષ્ટ્રપતિએ કહ્યું કે કામદારો, નાના કલાકારો, સહાયકો અને સર્જનાત્મક સમુદાયના સંઘર્ષરત સભ્યો સન્માન અને સામાજિક સુરક્ષાને પાત્ર છે. તેમણે વ્યાપક માનવીય દ્રષ્ટિકોણ સુનિશ્ચિત કરવા માટે તમામ જ્યુરીમાં મહિલાઓની ભાગીદારીનું આહ્વાન પણ કર્યું હતું.
લોકપ્રિય કલાકારોના પ્રભાવને પ્રકાશિત કરતા, ખાસ કરીને બાળકો અને યુવાનો પર, રાષ્ટ્રપતિએ સફળ કલાકારોને શિસ્તબદ્ધ જીવનશૈલીના ફાયદાઓને પ્રોત્સાહન આપવા અને સ્વાસ્થ્ય માટે હાનિકારક પદાર્થોનું સમર્થન કરવાનું ટાળવા માટે વિનંતી કરી.
રાષ્ટ્રપતિએ કહ્યું કે દેશમાં બની રહેલી ફિલ્મોની ગુણવત્તા તેમના વિશ્વાસને મજબૂત કરે છે કે ભારતીય સિનેમા વિશ્વસ્તરીય ધોરણો સ્થાપિત કરી શકે છે.
નર્મદા જિલ્લાના કેવડિયા- એકતાનગરમાં યોજાયેલા 72મા નેશનલ ફિલ્મ એવોર્ડ વિતરણ સમારોહમાં કાર્તિક આર્યનને ફિલ્મ ‘ચંદુ ચેમ્પિયન’ માટે બેસ્ટ એક્ટર અને મામૂટીને ‘બ્રહ્મયુગ’ માટે બેસ્ટ એક્ટરનો નેશનલ એવોર્ડ મળ્યો હતો. ફિલ્મ ‘આર્ટિકલ 370’ માટે યામી ગૌતમને બેસ્ટ એકટ્રેસનો એવોર્ડ અપાયો હતો. તેમજ દક્ષિણ ભારતના એક્ટર અને KGFમાં કામ કરનાર અનંત નાગને દાદાસાહેબ ફાળકે પુરસ્કારથી સન્માનિત કરાયા હતા. તેમણે કન્નડ, તેલુગુ અને હિન્દી સહિત 300 થી વધુ ફિલ્મોમાં અભિનય કર્યો છે.
રાષ્ટ્રપતિ મુર્મુએ ‘શ્રીકાંત’ને શ્રેષ્ઠ હિન્દી ફિલ્મનો પુરસ્કાર અને ‘આર્ટિકલ 370’ને શ્રેષ્ઠ ફીચર ફિલ્મનો એવોર્ડ આપ્યો હતો. તમિલ સ્ટાર ધનુષને બે કેટેગરીમાં નેશનલ એવોર્ડ અપાયો હતો. ગુજરાતી ફિલ્મ ‘મારણ’ને બેસ્ટ ગુજરાતી ફિલ્મનો અવોર્ડ મળ્યો છે.
દાદાસાહેબ ફાળકે એવોર્ડ મેળવ્ચા બાગ અનંત નાગે કહ્યું, તમે એક એક્ટર તરીકે મારો અભિનય જોયો હશે. મેં મારા બાળપણના 12 વર્ષ આશ્રમમાં વિતાવ્યા. તે પછી, મને મુંબઈ મોકલાયો, જ્યાં મને ચૈતન્ય મહાપ્રભુ નાટકમાં અભિનય કરવાની તક મળી. તે સમયે, કોઈને ખબર નહોતી કે કારકિર્દી શું છે. મેં મારું પેટ ભરવા માટે મારી કારકિર્દી શરૂ કરી અને પછી પાંચ વર્ષમાં 50 નાટકો કર્યા.”છેલ્લા 50 વર્ષોમાં, મને ઘણી બધી ભાષાઓની ફિલ્મોમાં કામ કરવા માટે આમંત્રણ મળ્યું છે. મેં બીજી ભાષાઓમાં ફિલ્મો કરી છે, પરંતુ મને સૌથી મોટી તકો કર્ણાટક અને કન્નડ ફિલ્મોમાં મળી છે. એવોર્ડ મેળવ્યા પછી કાર્તિક આર્યને કહ્યું, હું ખૂબ જ ખુશ છું. હું મારા આખા પરિવાર સાથે છું. આ ખૂબ જ ભાવનાત્મક ક્ષણ છે. મને એક અનરિયલ ફીલિંગ થાય છે, અને હું તેને વ્યક્ત કરી શકતો નથી.
