FIH પ્રો લીગ : સ્પેનની પુરુષ અને મહિલા હોકી ટીમો ભારત આવી
FIH પ્રો લીગ મેચો માટે, સ્પેનની પુરુષ અને મહિલા હોકી ટીમો ભારત પહોંચી ગઈ છે, જે પહેલા ભારત સામે ત્યાર બાદ ઈંગ્લેન્ડ સામે રમશે. ઓડિશાના ભુવનેશ્વરમાં બીજુ પટનાયક આંતરરાષ્ટ્રીય વિમાનમથક પર સ્પેનની પુરુષ અને મહિલા હોકી ટીમો એકસાથે આવી પહોંચી. બંને ટીમો અહીં યોજાનારી એફઆઈએચ હોકી પ્રો લીગ 2024-25 મેચો માટે અહીં આવી છે. પુરુષ ટીમ પહેલા યજમાન ભારત સામે અને પછી ઇંગ્લેન્ડ સામે રમશે. તેવી જ રીતે, મહિલા ટીમે જર્મની અને ભારત સામે મેચ રમવાની છે.
સ્પેન મેન્સ હોકી ટીમના કેપ્ટન અલ્વારો ઇગ્લેસિયસે ભારતમાં રમવા અંગે પોતાના વિચારો શેર કર્યા અને કહ્યું, “અમે ખૂબ જ ઉત્સાહિત છીએ. અમે ચાર મેચ માટે ઓસ્ટ્રેલિયામાં હતા, પરંતુ અમારે સુધારો કરવાની જરૂર છે, તેથી હું અહીં વધુ મેચ જીતવા માટે આતુર છું.” તેમણે કહ્યું, “અમને હંમેશા ભારતમાં રમવાનું ગમે છે કારણ કે અહીં હોકી ખૂબ જ લોકપ્રિય છે અને સ્ટેડિયમ હંમેશા ચાહકોથી ભરેલા રહે છે.”
મહિલા ટીમની કેપ્ટન લુસિયા જિમેનેઝે પણ કંઈક આવું જ કહ્યું. તેમણે કહ્યું કે, આ (ભુવનેશ્વર) ખરેખર હોકી માટે એક મહત્વપૂર્ણ શહેર છે અને અમે અહીં રમવા માટે ખૂબ જ ઉત્સાહિત છીએ. આ ટુર્નામેન્ટ અમારા માટે મહત્વપૂર્ણ છે અને અમે આવતા વર્ષે એફઆઈએચ પ્રો લીગમાં જોડાવા માંગીએ છીએ, તેથી અમે જાણીએ છીએ કે જીતવું અમારા માટે ખૂબ જ મહત્વપૂર્ણ છે. અમે દરેક મેચ જીતવા માટે શ્રેષ્ઠ હોકી રમવાનો પ્રયાસ કરીશું.
