- ઓડિસાથી ટ્રકમાં ડ્રગ્સનો જથ્થો લવાયો હતો.
- વટવા જીઆઈડીસીમાં ડિલિવરી કરે તે પહેલા ક્રાઈમ બ્રાન્ચનું ઓપરેશન,
- ડ્રગ્સનો જથ્થો કોને આપવાનો હતો તે દિશામાં તપાસ
અમદાવાદઃ ગુજરાતમાં ડ્રગ્સ પકડવાનો સિલસિલો યથાવત છે. અગાઉ ગુજરાતના દરિયાકાંઠા વિસ્તારોમાં જુદા જુદા સ્થળોએ બીનવારસી ડ્રગ્સના પેકેટો પકડાયા હતા. ડ્રગ્સની હેકાફેરી સામે પોલીસ સક્રિય બની છે. ત્યારે અમદાવાદમાં ઓડિસાથી ટ્રકમાં લવાયેલો 200 કિલોથી વધુ ડ્રગ્સ અને ગાંજાનો જથ્થો શહેર ક્રાઈમ બ્રાન્ચે પકડી પાડ્યો છે. અને 3 આરોપીઓની ધરપકડ કરી છે. આરોપીઓ ડિલિવરી આપવા માટે આવી રહ્યા હતા. વટવા GIDCમાં ડિલિવરી કરે તે અગાઉ જ ક્રાઇમ બ્રાન્ચે ત્રણેય આરોપીઓને ઝડપી મોટી માત્રામાં ગાંજો અને ડ્રગ્સ કબ્જે કર્યો છે. આ જથ્થો કોને કોને આપવાનો હતો તે દિશામાં વધુ તપાસ હાથ ધરી છે.
અમદાવાદ ક્રાઇમ બ્રાન્ચે બાતમીના આધારે ઓડિસાથી આવેલી ટ્રક ઝડપી હતી. જેમાં તપાસ કરતા ટ્રકમાંથી સૂકવેલો ગાંજાનો પાવડર અને એમડી ડ્રગ્સ મળી આવ્યો હતો. અંદાજિત 200 કિલોથી વધુ ગાંજો અને ડ્રગ્સનો જથ્થો મળી આવ્યો હતો. આ જથ્થા સાથે ઓડિશાના ત્રણ શખસની પણ ધરપકડ કરવામાં આવી છે. આરોપીઓ ઓડિશાથી ટ્રકમાં આ જથ્થો લઈને આવ્યા હતા. અમદાવાદની વટવા GIDCમાં ડિલિવરી કરવાના હતા. પરંતુ તે અગાઉ જ આરોપીઓને ક્રાઈમ બ્રાન્ચે દબોચી લીધા હતા..
શહેર ક્રાઈમ બ્રાન્ચના સૂત્રોએ જણાવ્યું હતું કે, આરોપીઓ ગુજરાત સહિત અન્ય રાજ્યોમાં ડિલિવરી કરીને આવ્યા હોવાની પણ શંકા છે. જેથી તે મામલે તપાસ કરવામાં આવી રહી છે. આ ઉપરાંત વટવા GIDCમાં જે વ્યક્તિને ડિલિવરી આપવાના હતા તેની પણ તપાસ કરવામાં આવશે. અમદાવાદમાં અન્ય કોઈ જગ્યાએ ડિલિવરી આપવામાં હતા કે કેમ અને અગાઉ પણ આ રીતે ગાંજા અને ડ્રગ્સની ડિલિવરી કરવામાં આવી છે કે કેમ તે દિશામાં તપાસ હાથ ધરવામાં આવી છે.
