કર્ણાટકઃ ત્રીજી પત્નીની હત્યા કરનાર 75 વર્ષીય વૃદ્ધની 23 વર્ષ બાદ પોલીસે કરી ધરપકડ

બેંગ્લોરઃ કર્ણાટકના કોપ્પલ જિલ્લામાંથી ચોંકાવનારી ઘટનામાં કોપ્પલ પોલીસે 75 વર્ષીય હનુમાનથપ્પાની ધરપકડ કરી છે. આશ્ચર્યજનક વાત એ છે કે હનુમાનથપ્પાએ 23 વર્ષ પહેલા પોતાની ત્રીજી પત્નીની ક્રૂરતાથી હત્યા કરી હતી અને ત્યારથી તે ફરાર હતો. આખરે 23 વર્ષ પછી, કોપ્પલના ગંગાવતી સિટી પોલીસ સ્ટેશનની પોલીસે પત્નીની હત્યાના આરોપી પતિ હનુમાનથપ્પાની ધરપકડ કરી છે.

માહિતી મુજબ, હનુમાનથપ્પાએ વર્ષ 2002માં તેની પત્ની રેણુકમ્માની ક્રૂરતાથી હત્યા કરી હતી. હત્યા બાદ, તેણે પુરાવાનો નાશ કરવા માટે પત્નીના મૃતદેહને કોથળામાં ભરીને બસમાં મૂકી દીધો હતો. આ ઘટના કર્ણાટકના કોપ્પલ જિલ્લામાં બની હતી, જ્યારે લાશ બાદમાં રાજ્યના બલ્લારી જિલ્લામાં મળી આવી હતી. હનુમંતપ્પા હત્યા બાદ ફરાર હતો અને છેલ્લા 23 વર્ષથી પોલીસ કસ્ટડીની બહાર હતો. તાજેતરમાં, તે રાજ્યના રાયચુર જિલ્લાના માનવી તાલુકામાં સ્થિત તેના વતન ગામ હલ્ધલ (અલધલ) પાછો ફર્યો હતો. ગંગાવતી પોલીસ સ્ટેશનને હત્યાના આટલા વર્ષો પછી આરોપી ગામમાં પરત ફર્યાની માહિતી મળી હતી. માહિતી મળતાં જ ગંગાવતી પોલીસે આરોપીની ધરપકડ કરી છે.

આ મામલો કર્ણાટકના ત્રણ જિલ્લાઓ, કોપ્પલ (જ્યાં હત્યા થઈ હતી), બલ્લારી (જ્યાંથી લાશ મળી આવી હતી) અને રાયચુર (જ્યાંથી આરોપીની ધરપકડ કરવામાં આવી હતી) માં ફેલાયેલો છે. આરોપી સામે ગંગાવતી સિટી પોલીસ સ્ટેશનમાં કેસ નોંધવામાં આવ્યો છે. પોલીસ હવે તપાસ કરી રહી છે કે તે આટલા વર્ષો સુધી કાયદાથી કેવી રીતે દૂર રહ્યો. હનુમંતપ્પા હવે 75 વર્ષના હોઈ શકે છે, પરંતુ આ 23 વર્ષ જૂના જઘન્ય ગુનાએ ફરી એકવાર લોકોને ચોંકાવી દીધા છે.