વડોદરા,18 જાન્યઆરી 2026: શહેરના વારસિયા વિસ્તારમાં સિનિયર સિટીઝન વેપારી ઉપર હુમલો કરી 10 લાખની લૂંટના બનાવવામાં ક્રાઈમ બ્રાન્ચે પાંચ લૂંટારાને ઝડપી પાડી ઇન્ડિયન અને વિદેશી કરન્સી મળી 25 લાખની મતા કબજે કરી છે.
આ બનાવની વિગત એવી હતી કે, શહેરના વારસિયા હરણી રિંગ રોડ પર ચતુરભાઈ પાર્કમાં રહેતા લીલા રામ રેવાણી નામના 68 વર્ષીય વેપારી તા 16મી એ રાત્રે દુકાનેથી આવી કારમાંથી નીચે ઉતરતા હતા ત્યારે ચાર શખસોએ તેમના પર હુમલો કરી દસ લાખની રોકડ ભરેલી બેગ લુટી લીધી હતી. આ વખતે વેપારીએ બૂમો પાડી પીછો કરતા અનિલ મારવાડી નામનો એક લૂંટારો પકડાઈ ગયો હતો. જ્યારે, બીજા લૂંટારૂં શખસો રિક્ષામાં બેઠેલા એક શખસને લૂંટેલી બેગ આપી ફરાર થઈ ગયા હતા. આ બનાવની ફરિયાદ બાદ ક્રાઈમ બ્રાન્ચે તપાસ હાથ ધરી હતી. અને સીસીટીવી ફૂટેજના આધારે જુદા જુદા વિસ્તારમાં વોચ રાખી ગણતરીના કલાકોમાં જ આણંદના હિરેન વસાવાને રિક્ષામાં કારેલીબાગ વિસ્તારમાંથી ઝડપી પાડ્યો હતો. તેની પાસે જુદી જુદી વિદેશી કરન્સી તેમજ ભારતીય નોટો મળી 25 લાખની મતા મળી હતી.
લૂંટના આ બનાવવામાં પોલીસની તપાસ દરમિયાન શના વાઘેલા નામના એક સાગરીતનું નામ ખુલ્યું હતું. જેથી પોલીસે વારસિયાના શિવધારા એપાર્ટમેન્ટમાં રહેતા શના વાઘેલાને ઝડપી પાડ્યો હતો. તપાસ દરમિયાન લુટારાઓએ શનાને લૂંટમાં મોટી રકમ હાથ લાગે તેવી કોઈ સારી ટીપ આપવા કહ્યું હતું. જેથી શનાએ ઉપરોક્ત વેપારી વિશે માહિતી આપી હતી.
શહેર ક્રાઈમ બ્રાન્ચે આરોપી હરીશ અને શનાને દબોચી લીધા બાદ પોલીસે માસ્ટર માઈન્ડ આકાશ વીરુભાઈ દેવીપુજક (જલારામ પાર્ક,રેલ્વે સ્ટેશન પાસે, આણંદ), રવિ મુન્નાભાઈ ઠાકોર રાધિકા પાર્ક સોસાયટી રેલ્વે સ્ટેશન પાછળ આણંદ) અને અતુલ અશોકભાઈ દેવીપુજક (જલારામ પાર્ક,આણંદ) ને ઝડપી પાડ્યા હતા. તમામ પાંચે લુંટારાઓની ઉચ્ચ પોલીસ અધિકારીઓ દ્વારા વધુ પૂછપરછ કરવામાં આવી રહી છે.
