વડોદરા, 19 ફેબ્રુઆરી 2026: ગુજરાતમાં ડ્રગ્સની હેરાફેરી વધતી જાય છે. ડ્રગ્સ માફિયાઓ હવે ટ્રેન દ્વારા પણ ડ્રગ્સની હેરાફેરી કરી રહ્યા છે. જેમાં પકડાઈ ન જાય એટલે ટ્રેનના કોચમાં પ્રવાસીના સ્વાંગમાં આવીને બિન વારસી ડ્રગ્સના પાર્સલ છોડી દેવામાં આવે છે. અને જ્યા ડ્રગ્સ મોકલવાનું હોય તે શહેરમાં ટ્રેન પહોંચતા ડ્રગ્સના પાર્સલ ઉતારી લેવામાં આવતા હોય છે. ડ્રગ્સ માફિયાની આ નવી માડેસ ઓપરેન્ડીથી પોલીસ પણ સક્રિય બની ગઈ છે. પશ્ચિમ રેલવે વડોદરાની એસ.ઓ.જી. અને એન.ડી. પી. એસ. ડેડીકેટેડ ટીમે પુરી-ગાંધીધામ એક્સપ્રેસ ટ્રેનમાંથી 10.48 લાખની કિંમતનો 20.975 કિલોગ્રામ ગાંજાનો જથ્થો ઝડપી પાડયો છે.
આ બનાવની વિગત એવીછે કે, ગતરોજ વડોદરા રેલવે એસ.ઓ.જી.ના પોલીસ સબ ઇન્સ્પેક્ટર એચ.પી. રવિયા અને તેમની ટીમ પુરી-ગાંધીધામ એક્સપ્રેસ (ટ્રેન નં.12994)માં પેટ્રોલિંગમાં હતી. આ દરમિયાન ટ્રેન બારડોલી સ્ટેશન પસાર કરી સુરત તરફ આવી રહી હતી. ત્યારે કોચ નં. એસ/5 અને એસ/6ના કોરીડોરમાંથી ત્રણ શંકાસ્પદ બેકપેક મળી આવ્યા હતા. તપાસને આગળ ધપાવતા એસ/5 કોચના બાથરૂમ નંબર 3ની ઉપરના પાટિયાના બોલ્ટ ખોલી તપાસ કરતા તેમાંથી વધુ ત્રણ હાથથેલીઓ મળી આવી હતી. પોલીસે તમામ બેગની તપાસ કરતા તેમાંથી કુલ 20.975 કિલોગ્રામ ગાંજો મળી આવ્યો હતો, જેની બજાર કિંમત 10,48,750 રૂપિયા થાય છે.
પ્રાથમિક તપાસ મુજબ, કોઈ અજાણ્યો ઇસમ આ જથ્થો પરપ્રાંતમાંથી આર્થિક લાભ માટે લાવ્યો હતો, પરંતુ પોલીસના ચેકિંગના ડરથી મુદ્દામાલ બિનવારસી હાલતમાં છોડીને નાસી છૂટ્યો હતો. આ અંગે સુરત રેલવે પોલીસ સ્ટેશનમાં એન.ડી.પી.એસ. એક્ટની વિવિધ કલમો હેઠળ ગુનો નોંધી વધુ તપાસ હાથ ધરવામાં આવી છે.
