અમદાવાદ, 05 માર્ચ 2026: A drunk driver of a police team drove a jeep over a divider શહેરના નિકોલ પોલીસ સ્ટેશનની શી ટીમની ગાડીના આઉટસોર્સ ડ્રાઇવરે નશાની હાલતમાં સ્ટિયરિંગ પરથી કાબૂ ગુમાવતા પોલીસની જીપ ડિવાઈડર પર ચઢાવી દીધી હતી. આ અકસ્માતને લીધે આજુબાજુના લોકો દોડી આવ્યા હતા. અને લોકોએ જ્યારે તપાસ કરી તો પોલીસની જીપમાંથી દારૂનું ક્વાર્ટર મળી આવ્યું હતું. પોલીસે આ મામલે આઉટસોર્સ ડ્રાઇવર વિરુદ્ધ ગુનો નોંધી તેની ધરપકડ કરી કાયદેસરની કાર્યવાહી હાથ ધરી છે.
શહેરના નિકોલ વિસ્તારમાં આવેલા ભવાની ચોક પાસે ગત રાત્રે 10:00 વાગ્યાની આસપાસ પોલીસની ગાડીના ડ્રાઇવર દ્વારા બેફામપણે ગાડી ચલાવીને ડિવાઇડર ઉપર ચડાવી દેવામાં આવી હતી. ગાડીનો અકસ્માત થતા ત્યાંથી પસાર થતા લોકોના ટોળેટોળા ભેગા થઈ ગયા હતા. ગાડીમાં ડ્રાઇવર બેઠો હતો અને તેમાં તપાસ કરતા દારૂનું ક્વાર્ટર પણ ગાડીમાંથી મળી આવ્યું હતું.
સ્થાનિક લોકોએ આ બનાવની પોલીસને જાણ કરતા પોલીસની ટીમ ઘટના સ્થળે દોડી આવી હતી. પોલીસે દારૂ પીધેલી હાલતમાં ડ્રાઇવર હોવાનું જાણવા મળતા અકસ્માત સ્થળ પરથી સ્થાનિક લોકોને દૂર કર્યા હતા. દારૂ પીધેલી હાલતમાં પોલીસની ગાડીનો ડ્રાઇવર ઝડપાતા લોકોએ વીડિયો ઉતાર્યો હતો. નિકોલ પોલીસ દ્વારા આ મામલે કાર્યવાહી કરવામાં આવી હતી.
નિકોલ પોલીસ સ્ટેશનની શી ટીમની ગાડીનો આઉટસોર્સ ડ્રાઇવર રાકેશ પાટીલ (રહે. કઠવાડા રોડ) હોવાનું સામે આવ્યું હતું. પોલીસ દ્વારા દારૂ પીને ગાડી ચલાવવા બદલ રાકેશ પાટીલ વિરુદ્ધ ગુનો નોંધી અને તેની ધરપકડ કરવામાં આવી છે. શહેરમાં દારૂને લઈને છેલ્લા કેટલાય સમયથી લોકોમાં પણ રોષ છે, ત્યારે ખુદ પોલીસની ગાડીનો જ ડ્રાઇવર દારૂ પી અને ગાડી ચલાવતો હોવાનું સામે આવતા નિકોલ પોલીસની કામગીરી સામે સવાલો ઊભા થયા છે.
