અમદાવાદ, 24 સપ્ટેમ્બર,2026 : High Court rejects writ petition filed by Congress corporator શહેરના મ્યુનિ, કોર્પોરેશનમાં વર્ષોથી ભાજપનું શાસન છે. અને મ્યુનિની વિવિધ કમિટીઓમાં કોંગ્રેસને કાઈ સ્થાન આપવામાં આવતું નથી. આથી એએમસીની વિવિધ કમિટીઓમાં કોંગ્રસના કોર્પોરેટરોને પણ સ્થાન મળે તે માટે કોંગ્રેસના કોર્પોરેટર મોહમ્મદ ઇલિયાસખાન પઠાણ દ્વારા ગુજરાત હાઈકોર્ટમાં રિટ કરવામાં આવી હતી. અરજીની સુનાવણી દરમિયાન ગુજરાત હાઇકોર્ટે અમદાવાદ મ્યુનિસિપલ કોર્પોરેશન અને મેયર હિતેશ બારોટ વિરુદ્ધની અરજી ફગાવી દીધી હતી.
અમદાવાદ મ્યુનિ.કોર્પોરેશનની વિવિધ કમિટીઓમાં સ્થાન આપવા માટે ખડિયાના કોંગ્રેસના કોર્પોરેટર મોહમ્મદ ઇલિયાસખાન પઠાણ દ્વારા ગુજરાત હાઈકોર્ટમાં રિટ દાખલ કરવામાં આવી હતી. કોંગ્રેસના કોર્પોરેટરે મ્યુનિસિપલ સમિતિઓમાં સભ્યપદની વહેંચણી સામે સવાલ ઉઠાવ્યા હતા. તેમની અરજીમાં 192 કોર્પોરેટરોનો ઉલ્લેખ કરવામાં આવ્યો હતો, જેમાં 160 સત્તાધારી પક્ષના અને 32 વિપક્ષના છે. તેમાં આક્ષેપ કરવામાં આવ્યો હતો કે સમિતિઓમાંથી વિપક્ષી કોર્પોરેટરોને બાકાત રાખવામાં આવ્યા હતા, જ્યારે સત્તાધારી પક્ષના કેટલાક સભ્યો એક કરતાં વધુ સમિતિઓમાં સ્થાન ધરાવતા હતા.
મેયર વતી સરકારી વકીલે વાંધો ઉઠાવ્યો હતો કે કાયદો સમિતિઓમાં વિરોધ પક્ષોના કોર્પોરેટરોના સમાવેશને ફરજિયાત બનાવતો નથી. તેમણે દલીલ કરી હતી કે અરજદારે સમિતિના સભ્યપદ માટેના કોઈ અમલપાત્ર હક કે મેયર અથવા કોર્પોરેશનને માંગવામાં આવેલું પ્રતિનિધિત્વ પૂરું પાડવા માટે બંધાયેલા રાખતી કોઈ કાનૂની જવાબદારી દર્શાવી નથી. આ અરજી ફગાવી દેવાતાં સમિતિઓમાં વિપક્ષી પ્રતિનિધિત્વ અંગે તેઓ જે નિર્દેશો માંગતા હતા તે મળ્યા નથી.
