Homeગુજરાતીગુજરાતસુરતમાં કરોડોના ખર્ચે બનાવાયેલું મ્યુનિનું ફિશ માર્કેટ 3 વર્ષથી ઉદઘાટન ન થતાં...

સુરતમાં કરોડોના ખર્ચે બનાવાયેલું મ્યુનિનું ફિશ માર્કેટ 3 વર્ષથી ઉદઘાટન ન થતાં ખંડેર બની ગયુ

  • સુરત મ્યુનિ.કોર્પોરેશન દ્વારા નાનપુરા વિસ્તારમાં ફિશ માર્કેટનું બિલ્ડિંગ બનાવ્યુ છે,
  • ખંડેર જેવા બની ગયેલા માર્કેટમાં અજાણ્યા ઈસમનો મૃતદેહ મળ્યો,
  • લોકાર્પણ ન થતાં ફીશ માર્કેટ અસામાજિક તત્વોનો અડ્ડો બની ગયુ

સુરતઃ શહેરમાં નાનપુરા માછીવાડ વિસ્તારમાં મ્યુનિ.કોર્પોરેશન દ્વારા કરોડોના ખર્ચે ફિશ માટેની હોલસેલ માર્કેટ બનાવ્યા બાદ છેલ્લા ત્રણ વર્ષથી ઉદઘાટનની રાહ જોઈ રહી છે. મ્યુનિના સત્તાધિશોને ઉદઘાટન કરવાનો સમય મળતો નથી. એટલે હોલસેલ માર્કેટ શરૂ થઈ નથી. બીજીબાજુ છેલ્લા ત્રણ વર્ષથી તૈયાર હોવા છતાં ફિશ માર્કેટનું બિલ્ડિંગ ખંડેર જેવી હાલતમાં છે.અને અસામાજિત તત્વોનો અડ્ઢો બની ગયુ છે. આ માર્કેટની અંદરથી શનિવારે અજાણ્યા ઇસમનો મૃતદેહ મળી આવતા સમગ્ર વિસ્તારમાં સનસનાટી મચી જવા પામી છે. આ ઘટનાની જાણ થતાં જ પોલીસ કાફલો સ્થળ પર પહોંચી આવ્યો હતો અને મૃતદેહને પોસ્ટમોર્ટમ માટે ખસેડી કાયદેસરની કાર્યવાહી હાથ ધરી હતી.

ફિશ મર્ચન્ટ એસોસિએશનના પ્રમુખ કલ્પેશ નવસારીવાલાએ આ ઘટના અંગે તંત્ર પર ગંભીર આક્ષેપો કરતા જણાવ્યું હતું કે, સુરત મ્યુનિ.કોર્પોરેશન દ્વારા નવનિર્મિત ફિશ માર્કેટની અંદરથી આ મૃતદેહ મળી આવ્યો છે. આ માર્કેટ માછી સમાજના લોકોના આર્થિક વિકાસ માટે બનાવવામાં આવ્યું હતું, જે રોડ પર બેસીને વેપાર કરે છે. માર્કેટનું બિલ્ડિંગ તૈયાર હોવા છતાંયે ત્રણ વર્ષથી ઉદઘાટન કેમ કરવામાં આવનતું નથી. ફિશ માર્કેટનું ઉદ્ઘાટન ન થવાના કારણે આ સ્થળ દારૂડિયા, જુગારી, ચરસી અને ડ્રગ્સનું સેવન કરનારા લોકોનો અડ્ડો બની ગયું છે. એસોસિએશન તરફથી  વારંવાર લેખિતમાં અને મૌખિક રીતે સ્થાનિક કોર્પોરેટરથી લઈને સાંસદ સુધી રજૂઆત કરી ચૂક્યા છીએ. અમે મ્યુનિસિપલ કમિશનરને પણ વિનંતી કરી છે કે તાત્કાલિક માર્કેટ શરૂ કરાવો. પણ ફિશ માર્કેટ શરૂ કરાતુ નથી.

spot_img
spot_img
સંબંધિત લેખો
spot_img
spot_img

Most Popular

spot_img