અમેરિકાના નવા ચૂંટાયેલા રાષ્ટ્રપતિ ડોનાલ્ડ ટ્રમ્પ ટૂંક સમયમાં અમેરિકાના આગામી રાષ્ટ્રપતિ તરીકે શપથ લેવા જઈ રહ્યા છે. દરમિયાન, ગુરુવારે, તેમણે એક નિવેદનમાં જણાવ્યું હતું કે તેમની અને રશિયન રાષ્ટ્રપતિ વ્લાદિમીર પુતિન વચ્ચે મુલાકાત ગોઠવવાના પ્રયાસો કરવામાં આવી રહ્યા છે. મીડિયા રિપોર્ટ્સ અનુસાર, ટ્રમ્પે કહ્યું કે તેમણે પુતિનને જલ્દી મળવાની વાત કરી હતી, પરંતુ તેમણે આ સંભવિત મીટિંગની ડેડલાઈન નથી આપી. રશિયાની સરકારે પણ ટ્રમ્પના નિવેદન પર સકારાત્મક પ્રતિક્રિયા આપી છે.
રશિયન સરકારે આ પ્રકારના અહેવાલો પર પ્રતિક્રિયા આપી
રશિયન મીડિયાએ રશિયન સરકારના પ્રવક્તા દિમિત્રી પેસ્કોવને ટાંકીને કહ્યું કે ‘જો રાજકીય ઇચ્છાશક્તિ હશે તો રશિયા અને અમેરિકા વચ્ચે ઉચ્ચ સ્તરીય બેઠક યોજવામાં આવી શકે છે. અલબત્ત રાષ્ટ્રપતિ પુતિન તેનું સ્વાગત કરશે. પેસ્કોવે કહ્યું કે રશિયન રાષ્ટ્રપતિ પુતિને પણ કહ્યું છે કે તેઓ વાતચીત માટે તૈયાર છે. અહેવાલો અનુસાર, ટ્રમ્પ અને પુતિન આગામી છ મહિનામાં મુલાકાત કરી શકે છે. જો કે, હજુ સુધી બંને તરફથી આ બેઠક માટે કોઈ પ્રસ્તાવ આવ્યો નથી. ગયા ડિસેમ્બરમાં રશિયાના રાષ્ટ્રપતિ પુતિને પણ વર્ષની છેલ્લી પ્રેસ કોન્ફરન્સમાં કહ્યું હતું કે તેઓ યુક્રેન મુદ્દે અમેરિકાના નવા રાષ્ટ્રપતિ ડોનાલ્ડ ટ્રમ્પ સાથે વાતચીત માટે તૈયાર છે.
ટ્રમ્પે યુક્રેન યુદ્ધ રોકવાનું વચન આપ્યું છે
રાષ્ટ્રપતિ ચૂંટણી પ્રચાર દરમિયાન ડોનાલ્ડ ટ્રમ્પે રશિયા-યુક્રેન યુદ્ધને ખતમ કરવાનું વચન આપ્યું હતું. ટ્રમ્પે કહ્યું હતું કે તેઓ પદના શપથ લીધા બાદ 24 કલાકની અંદર રશિયા-યુક્રેન યુદ્ધ બંધ કરી દેશે. જોકે, ચૂંટણી જીત્યા બાદ તેમણે સ્વીકાર્યું કે યુદ્ધવિરામ પ્રક્રિયામાં સમય લાગશે. ટ્રમ્પે રશિયા-યુક્રેન યુદ્ધમાં અમેરિકાની સંડોવણી અને તેમાં અમેરિકાના પૈસા ખર્ચવાનો વિરોધ કર્યો છે. માનવામાં આવી રહ્યું છે કે ટ્રમ્પ રશિયાના રાષ્ટ્રપતિ સાથેની મુલાકાતમાં યુક્રેન યુદ્ધને રોકવાની વાત કરી શકે છે.
