મણિપુરના રાજ્યપાલ અજય કુમાર ભલ્લાએ શુક્રવારે લૂંટાયેલા અને ગેરકાયદેસર હથિયારો પોલીસને સોંપવાની સમયમર્યાદા 6 માર્ચના સાંજે 4 વાગ્યા સુધી લંબાવી હતી. પહાડી અને ખીણ વિસ્તારના લોકોએ વધારાના સમયની માંગણી કર્યા બાદ આ સમયમર્યાદા લંબાવવામાં આવી હતી. નિવેદનમાં કહેવામાં આવ્યું છે કે, ‘સ્વૈચ્છિક રીતે હથિયાર સમર્પણ કરવાની સાત દિવસની સમયમર્યાદા સમાપ્ત થઈ ગઈ હોવાથી ખીણ અને પહાડી વિસ્તારોના લોકોએ આ સમયગાળો વધારવાની વિનંતી કરી છે. મેં આ વિનંતીઓ પર વિચાર કર્યો છે અને 6 માર્ચે સાંજે 4 વાગ્યા સુધી સમયમર્યાદા વધારવાનો નિર્ણય લીધો છે. ખાતરી આપવામાં આવી હતી કે આ સમયગાળામાં તેમના હથિયારો સરેન્ડર કરનારાઓ સામે કોઈ શિક્ષાત્મક પગલાં લેવામાં આવશે નહીં.
અગાઉ, ચાર જિલ્લાઓમાં લોકોએ પોલીસ અને સુરક્ષા દળોને વિવિધ પ્રકારના 109 હથિયારો, વિવિધ દારૂગોળો અને અન્ય વસ્તુઓ સોંપી હતી. ગુરુવારે કાંગપોકપી જિલ્લાના સૈકુલ પોલીસ સ્ટેશનને નવ એમએમની સીબી1એ 1 પિસ્તોલ, નવ એમએમ મેગેઝિન, એક ગ્રેનેડ, કારતુસ અને બે વાયરલેસ સેટ સહિત અન્ય વસ્તુઓ સોંપવામાં આવી હતી. SBBL બંદૂક સહિત અનેક હથિયારો, બિષ્ણુપુર જિલ્લાના ફોગાકચાઓ ઇખાઈ પોલીસ સ્ટેશનને સોંપવામાં આવ્યા હતા. આ ઉપરાંત, ઇમ્ફાલ પશ્ચિમ અને ઇમ્ફાલ પૂર્વ જિલ્લાના વિવિધ પોલીસ સ્ટેશનોમાં શસ્ત્રો અને દારૂગોળો જમા કરવામાં આવ્યો હતો. રાજ્યપાલ અજય કુમાર ભલ્લાએ 20 ફેબ્રુઆરીએ લોકોને સાત દિવસની અંદર લૂંટેલા અને ગેરકાયદેસર રીતે રાખેલા હથિયારો સ્વેચ્છાએ પોલીસને સોંપવા વિનંતી કરી હતી. તેમણે આશ્વાસન આપ્યું હતું કે આ સમયગાળા દરમિયાન જે લોકો તેમના હથિયારો સરેન્ડર કરશે તેમની સામે કોઈ શિક્ષાત્મક પગલાં લેવામાં આવશે નહીં.
રેલવે ટ્રેક પરથી ત્રણ મહિલાઓના મૃતદેહ મળી આવ્યા હતા.
દરમિયાન શુક્રવારે સવારે કેરળના કોટ્ટયમમાં રેલવે ટ્રેક પરથી ત્રણ મહિલાઓના મૃતદેહ મળી આવ્યા હતા. મૃતકની ઉંમર, ઓળખ અને અન્ય વિગતો હજુ જાણવા મળી નથી. પોલીસે જણાવ્યું હતું કે એવી શંકા છે કે ત્રણેય જ્યારે સવારે 5.30 વાગ્યે કોટ્ટાયમ-નિલામ્બુર પેસેન્જર ટ્રેન એર્નાકુલમ તરફ જઈ રહી હતી ત્યારે ટ્રેક પર કૂદી પડ્યા હતા. જોકે, તેમણે કહ્યું કે આ મામલે તપાસ કરવામાં આવી રહી છે. અકસ્માતના કારણે થોડા સમય માટે રૂટ પર ટ્રેન સેવા ખોરવાઈ ગઈ હતી. પોલીસે જણાવ્યું કે મૃતદેહોને કોટ્ટયમ સરકારી મેડિકલ કોલેજ હોસ્પિટલમાં લઈ જવામાં આવ્યા છે.
