મુંબઈઃ નાગપુરમાં થયેલી હિંસા બાદ હાલ પરિસ્થિતિ કાબુમાં છે. બીજી તરફ તોફાની તત્વોને ઝડપી લેવા માટે પોલીસે કવાયત શરૂ કરી છે. દરમિયાન આ કેસમાં માસ્ટરમાઈન્ડ મનાતા ફહીમ શમીમ ખાનની ધરપકડ કરવામાં આવી હતી. આરોપીએ જ લોકોને ઉશ્કેરીને આ હિંસા ફેલાવી હોવાનું પ્રાથમિક તપાસમાં ખુલ્યું છે. પોલીસે અન્ય આરોપીઓને ઝડપી લેવા માટે ચક્રોગતિમાન કર્યાં છે.
પ્રાપ્ત માહિતી અનુસાર પોલીસે મહારાષ્ટ્રના નાગપુરમાં થયેલી હિંસા પાછળનો મુખ્ય સૂત્રધાર માનવામાં આવતા ફહીમ શમીમ ખાનની ધરપકડ કરી છે. તે 21 માર્ચ સુધી પોલીસ કસ્ટડીમાં છે. ફહીમ ખાન માઇનોરિટી ડેમોક્રેટિક પાર્ટી (MDP) ના શહેર પ્રમુખ છે. તેમણે કેન્દ્રીય મંત્રી અને ભાજપના વરિષ્ઠ નેતા નીતિન ગડકરી સામે નાગપુરથી લોકસભા અને વિધાનસભાની ચૂંટણી પણ લડી છે. બંને ચૂંટણીઓમાં તેમની ડિપોઝીટ જપ્ત થઈ ગઈ હતી. પોલીસ એફઆઈઆરમાં, ફહીમનું નામ આરોપીઓની યાદીમાં અન્ય લોકોના નામ સાથે સમાવેશ કરવામાં આવ્યો છે. એવો આરોપ છે કે તેણે શરૂઆતમાં પોલીસ સ્ટેશન પહોંચીને બજરંગ દળ અને લોકોને ઉશ્કેરવા વિરુદ્ધ ફરિયાદ નોંધાવી હતી.
નાગપુર પોલીસ કમિશનર રવિન્દ્ર સિંઘલે ફહીમ ખાન વિશે જણાવ્યું હતું કે હિંસામાં કેટલાક લોકોની ભૂમિકા છે કે તેમણે લોકોને ઉશ્કેર્યા છે તે જાણવા માટે તપાસ કરવામાં આવી રહી છે. અમે તપાસ કરી રહ્યા છીએ. અમે તપાસ કરી રહ્યા છીએ કે આ કેસમાં કોઈ એક વ્યક્તિ કે સંગઠન સામેલ હતું કે નહીં. અમે બધા ખૂણાઓની તપાસ કરી રહ્યા છીએ. તેમણે કહ્યું, “એફઆઈઆરમાં નામ આપવામાં આવેલા બધા આરોપીઓ નાગપુરના છે.
સોમવારે (17 માર્ચ) મહારાષ્ટ્રમાં વિશ્વ હિન્દુ પરિષદ (VHP) અને બજરંગ દળે ઔરંગઝેબની કબર હટાવવાની માંગણી સાથે પ્રદર્શન કર્યું હતું. દરમિયાન, નાગપુરમાં એક અફવા ફેલાઈ ગઈ કે ધાર્મિક પ્રતીકોવાળી ચાદર સળગાવી દેવામાં આવી છે. આ અંગે વિરોધ પ્રદર્શનો શરૂ થયા અને તેણે હિંસાનું સ્વરૂપ લીધું. ઘણા વાહનોને આગ ચાંપી દેવામાં આવી. હિંસામાં ઘણા પોલીસકર્મીઓ અને સામાન્ય લોકો ઘાયલ થયા હતા. હિંસાના કેસમાં પોલીસે અત્યાર સુધીમાં ત્રણ પોલીસ સ્ટેશનમાં 6 FIR નોંધી છે અને 51 લોકોની ધરપકડ કરી છે. પોલીસે 1250 લોકો સામે એફઆઈઆર નોંધી છે, જેમાંથી 100 થી 200 લોકોની ઓળખ અત્યાર સુધીમાં થઈ ગઈ છે. નાગપુર પોલીસનું સાયબર યુનિટ સોશિયલ મીડિયા પર વીડિયો વાયરલ કરનારા લોકોની પણ તપાસ કરી રહ્યું છે. 100 થી 150 સીસીટીવી કેમેરાના ફૂટેજની પણ તપાસ કરવામાં આવી રહી છે.
