ભાવનગર, 28 ડિસેમ્બર 2025: 40 high-tech city buses will run on 17 routes in Bhavnagar શહેરમાં એક સમયે સિટીબસ સેવાનો મોટાભાગના શહેરીજનો લાભ લેતા હતા. પણ તંત્રની અણઆવડતને લીધે સિટીબસ સેવા બંધ થઈ ગઈ હતી. અને છેલ્લા લાંબા સમયથી સિટી બસ સુવિધા બંધ હાલતમાં હોય શહેરીજનોએ નાછૂટકે રિક્ષામાં મુસાફરી કરવી પડી રહી છે. ત્યારે. કેન્દ્ર સરકાર દ્વારા ભાવનગર શહેરને જે 100 EV બસ ફાળવવામાં આવી છે તે પૈકીની 40 બસ નવા વર્ષથી કમૂરતા બાદ દોડતી કરવાનો નિર્ણય લેવાયો છે. જે પૈકીની 10 બસ ભાવનગરના નવનિર્મિત ડેપો પર આવી પહોંચી છે. આમ 14મી જાન્યુઆરી બાદ શહેરના રસ્તાઓ પર મ્યુનિ. બસ સેવાનો નાગરિકોને લાભ મળશે.
ભાવનગર શહેરના ટોપ થ્રી સર્કલ પાસે રૂપિયા 24 કરોડના ખર્ચે તૈયાર થયેલા અત્યાધુનિક ઈલેક્ટ્રિક બસ ડેપો ખાતે નવી 10 ઈવી બસો આવી પહોંચતા મેયર ભરત બારડ અને સ્ટેન્ડિંગ કમિટીના ચેરમેન રાજુ રાબડીયાએ નવી ઈવી બસોનું નિરીક્ષણ કર્યુ હતું. આ તકે તેમણે જણાવ્યું હતું કે, અન્ય 30 બસો પણ ટૂંક સમયમાં આવી જશે, જેનાથી કુલ 40 બસોનો કાફલો કાર્યરત થશે. નવી ઈલેક્ટ્રિક બસો નાગરિકોને આરામદાયક અને સુરક્ષિત મુસાફરીનો અનુભવ કરાવશે. સંપૂર્ણ એસી અને હાઈટેક તમામ બસો સંપૂર્ણપણે એરકન્ડિશન્ડ છે. બસમાં કેપેસિટી 25 મુસાફરોની બેસવાની ક્ષમતા, સુરક્ષા માટે બસમાં 4 સીસીટીવી કેમેરા લગાવવામાં આવ્યા છે, દિવ્યાંગો માટે ટ્રાયસિકલ સાથે ચડવા માટેની ખાસ વ્યવસ્થા, ઓટોમેટિક દરવાજા અને મુસાફરો માટે સ્પેશિયલ હેન્ડલ્સ, આ બસ મહત્તમ 75 કિમી/કલાકની ઝડપે દોડી શકશે.
મ્યુનિના સૂત્રોના જણાવ્યા મુજબ શહેરના 13 વોર્ડમાં અલગ-અલગ 17 રૂટ પર નવિન ઈવી બસો દોડાવવાનું આયોજન છે, અંદાજે 28 કિમીની પેરીફેરીમાં આ સેવાનો લાભ મળશે, મુસાફરોની સુવિધા માટે શહેરમાં 150 જેટલા નવા પીકઅપ બસ સ્ટેન્ડ પણ બનાવવામાં આવશે, અત્યારે ડિસેમ્બર એન્ડ ચાલી રહ્યો છે, RTO પાસિંગનું કામ ઝડપથી પૂર્ણ કરી, કમૂર્તા પૂર્ણ થયા બાદ તુરંત જ મેયર સાથે પરામર્શ કરી લોકો માટે આ સુવિધાનો શુભારંભ કરવામાં આવશે.
ભાવનગર શહેરના મેયર ભરત બારડએ જણાવ્યું હતું કે, ભાવનગર મ્યુનિ.કોર્પોરેશનમાં કેન્દ્ર સરકાર દ્વારા પીએમ-ઈ બસ સેવા અંતર્ગત મિની ઇલેક્ટ્રિક AC બસો આવી રહી છે 10 બસો આવી ગઈ છે. 30 બસ પણ ટૂંક સમયમાં આવી જશે. આ માટે હું વડાપ્રધાન નરેન્દ્ર મોદી અને ગુજરાત સરકારનો પણ ખૂબ આભાર માનું છું,ભાવનગરના લોકોને આ બસ સેવાથી રિક્ષા ભાડામાંથી મુક્તિ મળશે, તેનો મને ખૂબ જ આનંદ છે.
ભાવનગર મ્યુનિના સ્ટેન્ડિંગ કમિટીના ચેરમેન રાજુભાઈ રાબડીયાએ જણાવ્યું હતું કે, દેશના વડાપ્રધાન નરેન્દ્ર મોદીના વિઝન અને મિશન સાથે સમગ્ર દેશ ગતિશીલ બની રહ્યો છે ત્યારે, દેશની અંદર પર્યાવરણ અને પરિવહનને ધ્યાનમાં રાખીને અનેક રાજ્યોમાં પીએમ – ઈ બસ સેવાઓ શરૂ કરવાના શુભ આશયથી ભાવનગરને 40 બસોની પહેલા તબક્કામાં ડિલિવરી આપી છે, જેમાંથી 10 બસો આવી ગઈ છે. અને 30 બસો ઓન-વે છે, જે બે-ત્રણ દિવસમાં મળી જશે.
