કર્ણાટકઃ પ્રથમવાર પોસ્ટિંગ પર જઈ રહેલા IPS અધિકારીનું માર્ગ અકસ્માતમાં મૃત્યુ
બેંગ્લુરુઃ કર્ણાટકના હાસન જિલ્લામાંથી એક IPS અધિકારીનું રોડ અકસ્માતમાં મોત થયું હતું. તેઓ તેમના પ્રથમ પોસ્ટિંગ પર ચાર્જ લેવાના હતા. જો કે, તે પહેલા જ માર્ગ અકસ્માતમાં તેમનું અવસાન થયાનું જાણવા મળે છે. કર્ણાટક કેડરના 2023 બેચના IPS અધિકારી હર્ષ વર્ધન મધ્યપ્રદેશના રહેવાસી હતા. હર્ષવર્ધન જે પોલીસ વાહનમાં મુસાફરી કરી રહ્યા હતા તેનું હસન તાલુકામાં કિટ્ટાને નજીક ટાયર ફાટ્યું હતું, જેના પગલે ડ્રાઇવરે નિયંત્રણ ગુમાવ્યું હતું અને વાહન રસ્તાની બાજુના મકાન અને ઝાડ સાથે અથડાયું હતું.
પોલીસના જણાવ્યા મુજબ, વર્ધન હોલેનરસીપુરમાં પ્રોબેશનરી આસિસ્ટન્ટ સુપરિન્ટેન્ડેન્ટ ઓફ પોલીસ તરીકે ફરજ પર જવા માટે હસન જઈ રહ્યો હતો. એક વરિષ્ઠ પોલીસ અધિકારીએ જણાવ્યું હતું કે વર્ધનને માથામાં ગંભીર ઈજાઓ થઈ હતી અને હોસ્પિટલમાં સારવાર દરમિયાન તેમનું મૃત્યુ થયું હતું, જ્યારે ડ્રાઈવર માંજેગૌડાને સામાન્ય ઈજાઓ થઈ હતી.
પોલીસે જણાવ્યું કે આઈપીએસ અધિકારીએ તાજેતરમાં જ મૈસૂરમાં કર્ણાટક પોલીસ એકેડમીમાં ચાર સપ્તાહની તાલીમ પૂર્ણ કરી હતી. પોલીસે જણાવ્યું હતું કે પ્રાથમિક તપાસમાં જાણવા મળ્યું છે કે મુસાફરી દરમિયાન સરકારી વાહનનું ટાયર ફાટતાં કાર પલટી જતાં અકસ્માત સર્જાયો હતો. આ ઘટનામાં ડ્રાઈવર માંજે ગૌડાને પણ ઈજાઓ થઈ હતી. હર્ષવર્ધનનો પરિવાર બિહારનો છે પરંતુ હાલમાં તેઓ મધ્યપ્રદેશના સિંગરૌલી જિલ્લામાં રહે છે. હર્ષવર્ધનના પિતા સિંગરૌલીના એસડીએમ અભિષેક સિંહ છે.
હર્ષ વર્ધને તેમની એન્જિનિયરિંગ ડિગ્રી પૂર્ણ કરી હતી અને 2022-23 કર્ણાટક કેડર બેચના IPS અધિકારી હતા. તેમણે યુપીએસસી પરીક્ષામાં 153મો રેન્ક મેળવ્યો હતો અને પ્રથમ પ્રયાસમાં જ સિવિલ સર્વિસીસની પરીક્ષા પાસ કરી હતી. હાસનના પોલીસ અધિક્ષક મોહમ્મદ સુજીત અને સહાયક પોલીસ અધિક્ષક વેંકટેશ નાયડુએ હોસ્પિટલની મુલાકાત લીધી હતી.
