અમદાવાદ, 19 ફેબ્રુઆરી 2026: જિલ્લાના દસક્રોઈ તાલુકાના ટીંબા ગામ નજીક આવેલી એક પ્લાસ્ટિક ફેક્ટરીમાં ભીષણ આગ ફાટી નિકળતો સ્થાનિક લોકો દોડી આવ્યા હતા, અને આગ લાગ્યાની જાણ ફાયર બ્રિગેડને કરવામાં આવતા ફાયરબ્રિગેડના 15 વાહનો ઘટનાસ્થળે ધસી આવ્યા હતા અને ભારે જહેમત બાદ આગ કાબૂમાં લીધી હતી. આ બનાવમાં સદભાગ્યે કોઈ જાનહાનિ થઈ નહોતી.
દસક્રોઈના ટીંબા પાસે આવેલી ગુજરાત પોલીફેબમાં ગઈ મોડી રાતે આગ લાગી હતી. અને જોતજોતામાં આગે વિકરાળરૂપ ધારણ કર્યું હતું. આગ લાગ્યાની જાણ થતાં અમદાવાદ ફાયર વિભાગના 15 ફાયર ફાઇટર ઘટના સ્થળે પહોંચીને કલાકો જહેમત ઉઠાવી હતી. અને આજે સવારે આગ પર કાબૂ મેળવી લેવામાં આવ્યો છે. હાલ આ આગ લાગવા પાછળનું ચોક્કસ કારણ જાણવા મળ્યુ નથી.
ફાયર વિભાગના સૂત્રોના કહેવા મુજબ દસક્રોઈના ટીંબા પાસે આવેલી ગુજરાત પોલીફેબ કંપનીમાં આગ લાગી હતી. ગત મોડી રાતે ત્રણ વાગ્યાની આસપાસ અચાનક પોલીફેબ કંપનીમાં આગ લાગી હતી. આ ભીષણ આગના ગોટેગોટા દૂર દૂર સુધી દેખાતા હતા. જેના કારણે સ્થાનિકોમાં પણ ભયનો માહોલ છવાયો હતો. આ આગમાં કેટલું નુકસાન થયું તે અંગે હાલ કોઈ માહિતી મળી નથી. ફાયર વિભાગના 15 જેટલા ફાઇટરોએ ચારેક કલાકની જહેમત બાદ આગ પર કાબૂ મેળવી લીધો હતો. જેના કારણે સ્થાનિકોએ પણ હાશકારો થયો હતો.
