ડંકી રૂટથી વિદેશ મોકલાના કેસમાં NIA ના દિલ્હી અને હિમાચલ પ્રદેશમાં દરોડા, બેની ધરપકડ
નવી દિલ્હીઃ રાષ્ટ્રીય તપાસ એજન્સી (NIA) એ હિમાચલ પ્રદેશ અને દિલ્હીમાં બે અલગ અલગ સ્થળોએ દરોડા પાડ્યા હતા. આ દરમિયાન, ડંકી રૂટથી લોકોને વિદેશ મોકલવા અને માનવ તસ્કરી કરવાના ગંભીર આરોપોમાં બે લોકોની ધરપકડ કરવામાં આવી છે. ધરપકડ કરાયેલા આરોપીઓની ઓળખ સની ઉર્ફે સની ડોનકર અને શુભમ સંધલ ઉર્ફે દીપ તરીકે થઈ છે.
રાષ્ટ્રીય તપાસ એજન્સીએ જણાવ્યું હતું કે, દિલ્હી અને હિમાચલ પ્રદેશમાં અનેક સ્થળોએ દરોડા પાડવામાં આવ્યા હતા. આ દરમિયાન, બે લોકોની ધરપકડ કરવામાં આવી છે, જેઓ ‘યુએસમાં ડંકી રૂટ મારફતે માનવ તસ્કરી સંબંધિત મોટા રેકેટમાં સામેલ છે. આરોપીઓની ઓળખ સની ઉર્ફે સની ડોનકર અને શુભમ સંધલ ઉર્ફે દીપ હુંડી તરીકે થઈ છે, બંને માર્ચમાં ધરપકડ કરાયેલા ગગનદીપ સિંહ ઉર્ફે ગોલ્ડીના સહયોગી હતા.
તપાસમાં ખુલાસો થયો છે કે સનીએ મોસ્કોની એક છોકરી સાથે લગ્ન કર્યા હતા. તેમને છ વર્ષની એક પુત્રી છે. સની લગભગ સાત વર્ષથી તેની પત્ની સાથે ઘણી વખત વિદેશ પ્રવાસ કરી રહ્યો છે. એવો આરોપ છે કે સનીએ તેની પત્ની સાથે મળીને કેટલાક લોકોને ડંકી રૂટ દ્વારા વિદેશ મોકલવાના નામે લાખો રૂપિયા એકઠા કર્યા છે.
સની પર માનવ તસ્કરીની સાથે મની લોન્ડરિંગનો પણ આરોપ છે. NIA એ ભારતીય દંડ સંહિતાની કલમ 143 (માનવ તસ્કરી), 238 (ગુનાના પુરાવા ગાયબ કરવા અથવા ગુનેગારની ઓળખ છુપાવવા માટે ખોટી માહિતી આપવી), 318 (છેતરપિંડી), 61(2) (ગુનાહિત કાવતરું) અને પંજાબ ટ્રાવેલ પ્રોફેશનલ્સ રેગ્યુલેશન એક્ટ હેઠળ કેસ નોંધ્યો છે.
