ઉનાળાની ઋતુમાં તાપના કારણે ફક્ત સ્કિન જ નહીં પણ વાળ પણ ખરાબ થાય છે. તડકો અને પરસેવાના કારણે વાળ નિર્જીવ અને ડ્રાય બની જાય છે, જેના કારણે વધુ તૂટે છે. આવી સ્થિતિમાં, ઉનાળામાં વાળને વધુ કાળજીની જરૂર હોય છે, નહીં તો તેની તેમના પર ખૂબ જ ખરાબ અસર પડે છે. આથી આપણે ઘરે જ કુદરતી સીરમ તૈયાર કરીને વાળને ખરતાં અટકાવી શકીએ છીએ તેમજ વાળની ચમક પાછી લાવી શકીએ છીએ.
ગ્રીન ટી, એલોવેરા અને મધઃ એક કપ ગ્રીન ટી પલાળો, પછી તેમાં એલોવેરા જેલ અને મધ મિક્સ કરો અને તેને હલાવો જેથી હળવા જેલ જેવું સીરમ બને. તેને સ્ટોર કરવા માટે ફ્રીજમાં રાખો. શેમ્પૂ કર્યા પછી વાળમાં સીરમનું પાતળું પડ લગાવો. તમારા વાળને અસરકારક રીતે મોઇશ્ચરાઇઝ કરવા માટે તેને થોડીવાર માટે રહેવા દો. આ પછી વાળને પાણીથી ધોઈ લો.
દહીં અને મધઃ 2 ચમચી સાદા દહીંમાં 1 ચમચી મધ સારી રીતે મિક્સ કરીને પેસ્ટ તૈયાર કરો. આ પેસ્ટને તમારા વાળ પર લગાવો અને 20થી 30 મિનિટ પછી ધોઈ લો. મધ અને દહીંના મોઇશ્ચરાઇઝિંગ ગુણધર્મો તમારા વાળને સોફ્ટ બનાવશે અને પોષણ આપવામાં મદદ કરશે, તેમજ વાળનો ગ્રોથ પણ વધશે. એલોવેરા, નાળિયેર તેલ અને રોઝમેરીઃ આ સીરમ બનાવવા માટે, એલોવેરા જેલ અને નાળિયેર તેલને સારી રીતે મિક્સ કરો. સુગંધ માટે રોઝમેરી એસેન્શીયલ ઓઇલના થોડા ટીપાં ઉમેરો. ત્યારબાદ આ મિશ્રણને રેફ્રિજરેટરમાં રાખો અને પછી તેને ભીના વાળ પર લગાવો. સીરમ લગાવીને વાળ સ્ટાઇલ કરો. આનાથી તમારા વાળ લાંબા સમય સુધી સોફ્ટ રહેશે.
ગુલાબજળ અને ગ્લિસરીનઃ આ માટે, એક સ્પ્રે બોટલ લો અને તેમાં ગુલાબજળ અને ગ્લિસરીન સારી રીતે મિક્સ કરો. આ પછી, ભીના વાળને ટુવાલથી સૂકવી લો અને સીરમ સ્પ્રે કરો અને આંગળીઓ અથવા પહોળા દાંતાવાળા કાંસકાથી વાળને તમારી ઇચ્છા મુજબ સ્ટાઇલ કરો.
એવોકાડો, બદામનું તેલ અને લવંડર તેલઃ એવોકાડોને મેશ કરો અને તેમાં બદામનું તેલ ઉમેરો. સીરમને તાજગીભરી સુગંધ આપવા માટે તેમાં લવંડર એસેન્શીયલ ઓઇલ ઉમેરો. આ પછી આ સીરમ ભીના વાળ પર લગાવો. તેને 20 મિનિટ માટે રહેવા દો અને ત્યારબાદ પાણીથી ધોઈ લો.
