પાલનપુર, 16 જુલાઈ, 2026 : Newly constructed road in Palanpur dug up to lay a pipeline શહેરમાં લક્ષ્મણ ટેકરી વિસ્તારથી નગરપાલિકાને જોડતો નવો ડામર રોડ બનાવ્યા બાદ એક મહિનામાં લાખોના ખર્ચે બનેલો રોડ પાઈપ લાઈન નાંખવા માટે ખોદી નાખવામાં આવ્યો છે. આ ઘટનાથી શહેરીજનોમાં ભારે રોષ જોવા મળી રહ્યો છે અને સરકારના લાખો રૂપિયાનો વ્યય થયો છે.
પાલનપુર શહેરમાં નગરપાલિકાથી લક્ષ્મણ ટેકરી સુધી મહિના પહેલા જ ડામર રોડ બનાવવામાં આવ્યો હતો. આ નવો રોડ બનતા લોકોને ઘણી રાહત થઈ હતી. ત્યારે મહિના બાદ પાઈપ લાઈન નાંખવા માટે રોડ ખોદી નાંખવામાં આવ્યો છે. નગરપાલિકાના અધિકારીઓએ જણાવ્યું કે, આ રોડ ગુજરાત અર્બન ડેવલપમેન્ટ કંપની (GUDC)ની કામગીરી માટે ખોદવામાં આવ્યો છે. જોકે, રોડ બની ગયા પછી તેને તોડવામાં આવ્યો ત્યાં સુધી આ કામગીરીની તપાસ કેમ ન થઈ તે મોટો પ્રશ્ન છે.
પાલનપુર શહેરમાં રોડ બન્યા બાદ પાઇપલાઇન નાખવાના બહાને ફરી રોડ તોડી દેવાની આ એક સામાન્ય પેટર્ન બની ગઈ છે. અગાઉ શહેરના કોઝી વિસ્તારમાં પણ આવું જ બન્યું હતું, જ્યાં ભૂગર્ભ ગટરની પાઇપલાઇન નાખવા માટે નવો બનેલો રોડ ગણતરીના દિવસોમાં જ તોડી પડાયો હતો. શહેરના લક્ષ્મણ ટેકરી વિસ્તારથી નગરપાલિકાને જોડતો આ રોડ એક માસ પૂર્વે સ્થાનિક સ્વરાજ્યની ચૂંટણી સમયે બનાવવામાં આવ્યો હતો. છેલ્લા બે-ત્રણ વર્ષથી તૂટેલા રોડથી પરેશાન સ્થાનિકોને નવો રોડ બનતા હાશકારો થયો હતો. પરંતુ, એક માસમાં જ ફરી જેસીબી ફરી વળતા શહેરીજનોમાં તંત્રની બેદરકારી સામે ભારે રોષ જોવા મળી રહ્યો છે.
આ અંગે કોંગ્રેસ કોર્પોરેટર આશાબેન રાવલે જણાવ્યું હતું કે, ચૂંટણી દરમિયાન આ રોડ બનાવવામાં આવ્યો હતો. ચૂંટણીઓ નજીક આવી રહી હતી એટલે ભાજપ શાસિત નગરપાલિકા અને સરકારને લોકોના વોટ લેવાના હતા, જે માટે લાખો રૂપિયાના ખર્ચે આ રોડ બનાવ્યો હતો. ત્યારે હાલ આ રોડ GUDC દ્વારા તોડવામાં આવ્યો છે. અમે GUDCને જાણ કરી હતી કે, આ રોડ તોડવાનો હતો તો તમે નગરપાલિકાને જાણ કરી હતી કે નહીં?’ ત્યારે એમના દ્વારા જણાવવામાં આવ્યું કે, અમે ઓલરેડી નગરપાલિકાને જાણ કરી હતી.
