- ખૂલ્લી જીપ અને બાઈક પર ઊભા રહીને ક્ષત્રિય બહેનો તલવાર સમણશે,
- ભગિની સેવા ફાઉન્ડેશન દ્વારા કરાયુ આયોજન,
- ક્ષત્રિય બહેનો પરંપરાગત પહેરવેશમાં તલવાર રાસની રમઝટ બોલાવશે
રાજકોટઃ નવરાત્રીના પર્વના હવે ગણતરીના દિવસ બાકી રહ્યા છે, ત્યારે શહેરમાં નવરાત્રીની તૈયારીઓ શરૂ થઈ ગઈ છે. શહેરના રાજવી પેલેસમાં ભગિની સેવા ફાઉન્ડેશન દ્વારા ક્ષત્રિય બહેનોના તલવાર રાસનું આયોજન કરવામાં આવ્યુ છે. જેમાં 4 ઓક્ટોબરના રોજ બીજા નોરતે પરંપરાગત પહેરવેશમાં સજ્જ થઈને 11થી 55 વર્ષની ક્ષત્રિય બહેનો તલવાર રાસની રમઝટ બોલાવશે.
રાજકોટ શહેરના પેલેસ રોડ પર રાજવી માંધાતાસિંહજીના પેલેસ પ્રાંગણમાં ધારદાર તલવાર સાથે ક્ષત્રિય સમાજની બહેનો પ્રતિ વર્ષ તલવાર રાસ રમીને ભારતના ખમીરવંતા ઇતિહાસને પુનઃજીવિત કરે છે. જે અંતર્ગત ક્ષત્રાણીઓ દ્વારા તલવાર રાસની પ્રેક્ટિસ કરવામાં આવી હતી. 4 ઓક્ટોબરના રોજ બીજા નોરતે પરંપરાગત પહેરવેશમાં સજ્જ થઈને 11થી 55 વર્ષની બહેનો તલવાર રાસની રમઝટ બોલાવશે.
રાજકોટના રણજિત વિલાસ પેલેસ ખાતે દર વર્ષની જેમ આ વર્ષે પણ બીજા નોરતે ક્ષત્રાણીઓના શૌર્ય સમાન તલવાર રાસનું આયોજન કરવામાં આવ્યું છે. જેમાં 150 કરતાં વધુ બહેનો દ્વારા અવનવા કરતબ રજૂ કરવામાં આવશે. હાલ આ રાસની જોરશોરથી તૈયારી રાજવી પેલેસ ખાતે કરવામાં આવી રહી છે. કોઈ વિચારી પણ ન શકે તેવા કરતબ દર વર્ષે આ કાર્યક્રમ યોજવામાં આવે છે. અગાઉ મહિલાઓએ બાઈક અને ખુલ્લી જીપ પર સવાર થઇ તલવાર પકડીને રાસ કર્યો હતો. રાજવી પેલેસ ખાતે વર્ષ 2006થી નવરાત્રિમાં તલવાર રાસ રમાય છે. ગતવર્ષે બીજા અને ત્રીજા નોરતે તલવાર રાસનું આયોજન કરવામાં આવ્યું હતું. જેમાં પણ 200 જેટલી ક્ષત્રિય સમાજની બહેનોએ તલવાર રાસ લીધા હતા. આ દરમિયાન બાઈક અને ખુલ્લી જીપ પર સવાર થઇ પ્રથમ વખત તલવાર રાસ રમી ઉપસ્થિત સૌ કોઇને ઘોડેસવાર વીરાંગનાઓની ઝાંખી કરાવી હતી. આ ઉપરાંત બહેનોએ દીવડા, થાળી અને ટિપ્પણી રાસ પણ રજૂ કર્યો હતો.
રાજકોટ ખાતે ભગિની સેવા ફાઉન્ડેશન નામની સંસ્થા છેલ્લાં 15 વર્ષથી કાર્યરત છે. જેના પ્રમુખ રાજકોટનાં રાણીસાહેબ કાદમ્બરી દેવી જાડેજા છે. તેમનું માનવું છે કે, સ્ત્રીઓ દરેક કાર્યમાં આગળ વધે અને ઘરની બહાર નીકળી તેમનું કૌશલ્ય બતાવે. જે અંતર્ગત ક્ષત્રિય બહેનો નવરાત્રીમાં તલવાર રાસ રજૂ કરે છે. તલવાર રાસ એ શક્તિનું પ્રદર્શન છે. આ રાસની સાથે માતાજીની આરાધના માટે પ્રાચીન રાસ પણ રજૂ કરે છે. જેમાં તાલી રાસ, ગરબા રાસ, દીવા રાસ અને દાંડિયા રાસ સામેલ છે. તલવાર રાસ અહીંનું ખાસ આકર્ષણ છે. જેમાં પણ દર વર્ષે કંઈક નવું હોય છે.
