અમેરિકા અને ઈરાન વચ્ચે તણાવ સમાપ્ત કરવાના પ્રયાસો શરૂ
અમેરિકામાં ડોનાલ્ડ ટ્રમ્પની જીત બાદ પડદા પાછળ અનેક ગતિવિધિઓ ચાલી રહી છે. હવે મીડિયા રિપોર્ટ્સ અનુસાર, ટ્રમ્પના નજીકના અબજોપતિ બિઝનેસમેન એલોન મસ્ક સંયુક્ત રાષ્ટ્રમાં ઈરાનના રાજદૂતને મળ્યા છે. બંનેની મુલાકાતને અમેરિકા અને ઈરાન વચ્ચે ચાલી રહેલા તણાવને ખતમ કરવાના પ્રયાસ તરીકે જોવામાં આવી રહી છે.
બંને અજાણ્યા સ્થળે મળ્યા
અમેરિકન મીડિયાના અહેવાલો અનુસાર, ઈલોન મસ્ક અને ઈરાની રાજદૂત વચ્ચેની મુલાકાતથી વાકેફ ઈરાની અધિકારીઓએ તેને સકારાત્મક ગણાવ્યું હતું. અહેવાલો અનુસાર, બંને સોમવારે એક અજાણ્યા સ્થળે મળ્યા હતા અને એક કલાકથી વધુ સમય સુધી વાત કરી હતી. જોકે, ટ્રમ્પની ટીમના સભ્યો કે ઈરાની એમ્બેસીએ આ મીટિંગની પુષ્ટિ કરી નથી. જો મસ્ક અને ઈરાની રાજદૂત વચ્ચેની મુલાકાતની સત્તાવાર પુષ્ટિ થાય છે, તો તે સ્પષ્ટ થશે કે ટ્રમ્પ સરકાર ઈરાન સાથેના સંબંધો સુધારવા માગે છે. જો કે આ પગલાને કારણે ટ્રમ્પને ઈઝરાયલ ઉપરાંત પોતાની પાર્ટીના ઘણા રૂઢિચુસ્ત રિપબ્લિકન નેતાઓની નારાજગીનો સામનો કરવો પડી શકે છે.
ટ્રમ્પ સરકારમાં મસ્કની ભૂમિકા અસરકારક રહેશે
આ ઉપરાંત ઈરાની રાજદૂત સાથે મસ્કની મુલાકાત એ પણ પુષ્ટિ કરશે કે ટ્રમ્પની સરકારમાં ઈલોન મસ્કની ભૂમિકા ઘણી અસરકારક રહેશે. ટ્રમ્પ સરકારની વિદેશ નીતિમાં મસ્કની ભૂમિકા દેખાઈ રહી છે, ત્યારે ટ્રમ્પે ફેડરલ બ્યુરોક્રેસીમાં સુધારા માટે વિવેક રામાસ્વામી સાથે સરકારની કાર્યક્ષમતા વિભાગના પ્રભારી તરીકે મસ્કની નિમણૂક કરી છે.
