નવી દિલ્હીઃ ભારત અને કતાર વચ્ચેના સંબંધોને નવી મજબૂતી મળી છે. કતારના અમીર શેખ તમીમ બિન હમાદ અલ થાનીની ભારત મુલાકાત દરમિયાન, બંનેદેશોએ વેપાર, રોકાણ, ઉર્જા અને સાંસ્કૃતિક સહયોગ વધારવા માટે અનેક મહત્વપૂર્ણ કરારો પર હસ્તાક્ષર કર્યા. કતારે ભારતમાં ૧૦ બિલિયન યુએસ ડોલર (લગભગ 83,000 કરોડ રૂપિયા)ના રોકાણની જાહેરાત કરી છે જે ઈન્ફ્રાસ્ટ્રક્ચર, ટેકનોલોજી અને ઉત્પાદન ક્ષેત્રો પર ધ્યાન કેન્દ્રિત કરશે. વધુમાં, બંને દેશોએ 2030 સુધીમાં તેમના દ્વિપક્ષીય વેપારને બમણું કરવાનું લક્ષ્ય રાખ્યું છે અને સંભવિત મુક્ત વેપાર કરાર (FTA) પર વિચાર કરી રહ્યા છે.
કતારમાં ભારતની ડિજિટલ પેમેન્ટ સિસ્ટમ UPI ના અમલીકરણની પણ જાહેરાત કરવામાં આવી છે. હવે કતાર નેશનલ બેંક (QNB) ના પોઈન્ટ ઓફ સેલ (POS) સિસ્ટમ પર UPI દ્વારા ચુકવણી કરી શકાય છે, જે ભારતીય પ્રવાસીઓ અને વ્યવસાયોને સુવિધા પૂરી પાડશે. ઉપરાંત, કતાર નેશનલ બેંક ભારતમાં તેના વિસ્તરણની યોજના બનાવી રહી છે અને ટૂંક સમયમાં GIFT સિટી (ગુજરાત ઇન્ટરનેશનલ ફાઇનાન્સ ટેક-સિટી) માં એક નવી ઓફિસ ખોલશે.
બંને દેશો વચ્ચે ઉર્જા ક્ષેત્રમાં સહયોગ વધારવા માટે પણ કરાર થયો છે. ભારત અને કતાર તેલ અને ગેસ વેપારમાં રોકાણને વધુ ગાઢ બનાવશે જે ભારતની ઊર્જા સુરક્ષાને મજબૂત બનાવશે. આ ઉપરાંત, ભારતે કતારના નાગરિકોને ઈ-વિઝા સુવિધા આપવાનો નિર્ણય લીધો છે જેનાથી કતારના લોકો માટે ભારતની મુસાફરી સરળ બનશે. સંસ્કૃતિ અને રમતગમતના ક્ષેત્રમાં સંબંધોને મજબૂત બનાવવા માટે, ભારત અને કતારએ “સંસ્કૃતિ, મિત્રતા અને રમતગમતનું વર્ષ” ઉજવવાનું નક્કી કર્યું છે. આ અંતર્ગત, બંને દેશોમાં સાંસ્કૃતિક આદાન-પ્રદાન, રમતગમતના કાર્યક્રમો અને યુવાનો માટે વિવિધ કાર્યક્રમોનું આયોજન કરવામાં આવશે.
તે જ સમયે, નાણાકીય અને કર બાબતોમાં પારદર્શિતા વધારવા માટે, બંને દેશોએ બેવડા કરવેરા અટકાવવા અને આર્થિક સહયોગ માટે એક નવા કરાર પર હસ્તાક્ષર કર્યા છે. આ ઉપરાંત, નાણાં મંત્રાલયો વચ્ચે આર્થિક સહયોગ, રમતગમત અને યુવા બાબતોમાં ભાગીદારી, રાષ્ટ્રીય આર્કાઇવ્સ વચ્ચે ઐતિહાસિક દસ્તાવેજોનું સંરક્ષણ, ઇન્વેસ્ટ ઇન્ડિયા અને ઇન્વેસ્ટ કતાર વચ્ચે રોકાણ સહયોગ અને ભારતીય ઉદ્યોગ સંઘ (CII) અને કતાર બિઝનેસમેન એસોસિએશન વચ્ચે વ્યાપાર સહયોગ સહિત અનેક અન્ય કરારો પર પણ હસ્તાક્ષર કરવામાં આવ્યા હતા. અગાઉ, ભારતની મુલાકાત દરમિયાન, કતારના અમીરનું રાષ્ટ્રપતિ ભવનમાં ભવ્ય સ્વાગત કરવામાં આવ્યું હતું જ્યાં તેમને ગાર્ડ ઓફ ઓનર પણ આપવામાં આવ્યું હતું. આ મુલાકાતને ભારત અને કતાર વચ્ચેના સંબંધોને નવી ઊંચાઈએ લઈ જવા તરીકે જોવામાં આવી રહી છે.
