નવી દિલ્હીઃ આજથી ઉત્તરાખંડમાં સમાન નાગરિક સંહિતા-યુસીસી લાગુ થઈ રહ્યો છે. ઉત્તરાખંડ આ કાયદો લાગુ કરનાર દેશનું પ્રથમ રાજ્ય બનશે. મુખ્યમંત્રી પુષ્કર સિંહ ધામીએ જણાવ્યું હતું કે કાયદાના અમલીકરણ માટે તમામ તૈયારીઓ પૂર્ણ કરી લેવામાં આવી છે, જેમાં નિયમોની મંજૂરી અને સંબંધિત કર્મચારીઓને તાલીમ આપવાનો સમાવેશ થાય છે.
યુસીસીનો ઉદ્દેશ્ય બધા નાગરિકો માટે સમાન અધિકારો સુનિશ્ચિત કરવાનો છે. પુષ્કર સિંહ ધામીએ જણાવ્યું હતું કે આ અંતર્ગત, જાતિ, ધર્મ અને લિંગના આધારે નાગરિક અધિકારોમાં ભેદભાવ કરતા તમામ કાયદાઓમાં એકરૂપતા લાવવાનો પ્રયાસ કરવામાં આવ્યો છે.
ઉત્તરાખંડમાં 2022ની વિધાનસભા ચૂંટણીમાં UCCનો અમલ ભારતીય જનતા પાર્ટીની મુખ્ય પ્રતિબદ્ધતા હતી. રાજ્ય મંત્રીમંડળે તાજેતરમાં કાયદાના અમલીકરણ માટેના નિયમો અને વિનિયમોને મંજૂરી આપી હતી અને મુખ્યમંત્રીને તેના અમલીકરણની તારીખ નક્કી કરવા માટે અધિકૃત કર્યા હતા.
આ કાયદાના અમલીકરણથી લગ્ન, છૂટાછેડા, વારસો અને મિલકતના અધિકારો સહિત વ્યક્તિગત બાબતોમાં અનુસૂચિત જનજાતિ સિવાય રાજ્યના તમામ નાગરિકો માટે સમાન નિયમો અને અધિકારો સુનિશ્ચિત થશે. આ અંતર્ગત, બધા લગ્ન અને લિવ-ઇન-રિલેશનશીપ માટે નોંધણી ફરજિયાત બનાવવામાં આવી છે.
