દેશના વિવિધ ભાગમાં બે હજાર ડ્રાઈવિંગ તાલીમ શાળા શરૂ કરાશે

નવી દિલ્હીઃ કેન્દ્ર સરકારે દેશના વિવિધ ભાગમાં બે હજાર ડ્રાઈવિંગ તાલીમ શાળા શરૂ કરવાનો નિર્ણય કર્યો છે. નવી દિલ્હીમાં એક કાર્યક્રમમાં કેન્દ્રીય માર્ગ પરિવહન અને રાજમાર્ગ મંત્રી નીતિન ગડકરીએ કહ્યું, આ તાલીમ શાળા દેશના પછાત અને આદિવાસી વિસ્તારોમાં શરૂ કરાશે. તેનાથી યુવાનો માટે રોજગારની તકનું સર્જન થશે.  ગડકરીએ કહ્યું, દેશમાં અંદાજે 22 લાખ ડ્રાઈવરની અછત છે અને આ તાલીમ શાળા કુશળ ડ્રાઈવરની અછત પૂર્ણ કરવામાં મદદરૂપ થશે. ગડકરીએ ઉમેર્યું, તેમના મંત્રાલયે માર્ગ દુર્ઘટનાને ઘટાડવા અનેક પગલા ઉઠાવ્યા છે. તેમણે લોકોને ટ્રાફિક નિયમોનું પાલન કરવા પણ આહ્વાન કર્યું.