આતંકવાદ મુદ્દે પાકિસ્તાનને શસ્ત્રો અને ટેકનોલોજી પુરી ના પાડવા રાજનાથ સિંહે નેધરલેન્ડને કરી અપીલ

નવી દિલ્હીઃ સંરક્ષણ પ્રધાન રાજનાથ સિંહે નેધરલેન્ડના સંરક્ષણ પ્રધાન રુબેન બર્કેલમેન્સ સાથે મુલાકાત કરી હતી. આ દરમિયાન, બંને નેતાઓએ આગામી દિવસોમાં ભારત અને નેધરલેન્ડ વચ્ચે દ્વિપક્ષીય સંરક્ષણ ભાગીદારીને મજબૂત બનાવવા અંગે ચર્ચા કરી હતી. મીડિયા રિપોર્ટ્સ અનુસાર, રાજનાથ સિંહે નેધરલેન્ડના સંરક્ષણ પ્રધાનને કહ્યું કે તેમણે આતંકવાદને પ્રોત્સાહન આપતા પાકિસ્તાનને શસ્ત્રો અને ટેકનોલોજી પૂરી પાડવી જોઈએ નહીં.

બેઠક દરમિયાન હાજર લોકોએ જણાવ્યું હતું કે, રાજનાથ સિંહે રૂબેન બર્કેલમેન્સને કહ્યું હતું કે ભારત ઘણા વર્ષોથી પાકિસ્તાન પ્રાયોજિત આતંકવાદ સામે લડી રહ્યું છે. તેથી, નેધરલેન્ડ્સે પાકિસ્તાની સેનાને શસ્ત્રો, અદ્યતન સિસ્ટમો પૂરી પાડવી જોઈએ નહીં કે કોઈપણ ટેકનોલોજી શેર કરવી જોઈએ નહીં. પાકિસ્તાનને શસ્ત્રો પૂરા પાડવા એ પ્રાદેશિક સુરક્ષા માટે ખતરનાક છે. ભારતના મિત્ર દેશોએ આતંકવાદના પ્રાયોજકોને ટેકો ન આપવો જોઈએ.

સોશિયલ મીડિયા પોસ્ટમાં, રાજનાથ સિંહે કહ્યું કે, નવી દિલ્હીમાં નેધરલેન્ડના યુવાન અને ગતિશીલ સંરક્ષણ પ્રધાન રૂબેન બર્કેલમેન્સને મળીને ખૂબ આનંદ થયો. અમે ભારત-નેધરલેન્ડ સંરક્ષણ સહયોગના તમામ પાસાઓની સમીક્ષા કરી. અમે અમારી સંરક્ષણ ભાગીદારીને વધુ ગાઢ અને વિસ્તૃત કરવા આતુર છીએ. અમે સંરક્ષણ, સાયબર સુરક્ષા, ઇન્ડો-પેસિફિક અને AI જેવી ઉભરતી ટેકનોલોજી પર વ્યાપક ચર્ચા કરી.

સંરક્ષણ મંત્રાલયે જણાવ્યું હતું કે, બંને મંત્રીઓએ જહાજ નિર્માણ, સાધનો અને અવકાશ ક્ષેત્રોમાં સહયોગની શક્યતાઓ પર ચર્ચા કરી હતી. તેમણે AI અને સંબંધિત ટેકનોલોજી જેવા ક્ષેત્રોમાં સાથે મળીને કામ કરવા ઉપરાંત સંબંધિત સંરક્ષણ ટેકનોલોજી સંશોધન સંસ્થાઓ અને સંગઠનોને જોડવાની પણ ચર્ચા કરી.