જુનાગઢ, 16 સપ્ટેમ્બર,2026 : Two lions roamed in rainy weather જિલ્લામાં છેલ્લા કેટલાક દિવસોથી વરસાદી માહોલ સર્જાયો છે. જેના કારણે ગરવી ગિરનારની લીલીછમ ગીરીમાળાઓ સોળે કળાએ ખીલી ઊઠી છે. કુદરતી સૌંદર્યથી છલકાતા આ આહલાદક વાતાવરણમાં વન્યજીવો પણ મુક્ત મને વિહાર કરતા જોવા મળી રહ્યા છે. આવો જ એક રોમાંચક અને અદભુત નજારો શહેર નજીક આવેલા સુપ્રસિદ્ધ સરકડીયા હનુમાનજી મંદિર તરફ જતા માર્ગ પર જોવા મળ્યો હતો, જ્યાં બે નર સિંહોની જોડી રસ્તાની વચ્ચોવચ શાહી ઠાઠ સાથે લટાર મારતી કેમેરામાં કેદ થઈ હતી.
ચોમાસાની ઋતુમાં ગિરનારનું જંગલ અને તેની તળેટીનો વિસ્તાર વનરાજો માટે સૌથી અનુકૂળ આશ્રયસ્થાન બની ગયો છે. સિહનો મેટિંગ પરિયડ ચાલતો હોવાથી વન વિભાગ દ્વારા પણ ખાસ તકેદારી રાખવામાં આવી રહી છે. હાલ ઝરમર વરસાદ અને ફૂંકાતા ઠંડા પવન વચ્ચે જંગલમાંથી બે કદાવર નર સિંહો મુખ્ય રોડ પર આવી ચડ્યા હતા. સામાન્ય રીતે સિંહ પોતાની ગંભીરતા અને રુઆબ માટે જાણીતો છે, પરંતુ વરસાદી છાંટાની મજા માણતાં આ બંને વનરાજો કોઈપણ પ્રકારના ભય વગર અત્યંત નિરાંતે અને મસ્તમૌલા અંદાજમાં માર્ગ પર આગળ વધતા નજરે પડ્યા હતા. રસ્તા પરથી પસાર થતા રાહદારીઓ અને વાહનચાલકો આ અદભુત અને દિલધડક દ્રશ્ય જોઈને સ્તબ્ધ થઈ ગયા હતા. પોતાની જ મોજમાં રસ્તા પર ધીમી ગતિએ ચાલતી સિંહ બેલડીની આ શાહી ચાલ જોઈ લોકો રોમાંચિત થઈ ઊઠ્યા હતા. સ્થાનિકોએ આ અદભુત ક્ષણોને પોતાના મોબાઈલ કેમેરામાં કંડારી લીધી હતી, જે વીડિયો હાલ સોશિયલ મીડિયા પ્લેટફોર્મ્સ પર ભારે વાયરલ થઈ રહ્યો છે. સરકડીયા હનુમાનજી રોડ પર સિંહોની અવરજવર સામાન્ય હોવા છતાં, વરસતા વરસાદ વચ્ચે આ પ્રકારની નિર્ભય અને શાહી લટારનો નજારો વન્યપ્રેમીઓ માટે અનેરો આકર્ષણનો વિષય બન્યો છે.
