ગાંધીનગર, 27 ઓગસ્ટ 2026 : The Gujarat Police have mapped over 500 locations regarding the safety of women ગુજરાત પોલીસ દ્વારા હાથ ધરવામાં આવેલા ‘મિશન સુરક્ષિત શક્તિ’ હેઠળ પ્રથમ સપ્તાહમાં સમગ્ર રાજ્યમાં મહિલાઓ અને બાળકોની સુરક્ષા કરવા માટે મહત્વની કામગીરી કરવામાં આવી છે.
આ અભિયાન હેઠળ સંવેદનશીલ સ્થળોનું મેપિંગ, જોખમગ્રસ્ત પરિવારોની ઓળખ, પીડિતો સાથે ફોલો-અપ, કાઉન્સેલિંગ, સંસ્થાકીય સુરક્ષા ઓડિટ અને સામુદાયિક સશક્તિકરણ સહિતની વિવિધ પ્રવૃત્તિઓ હાથ ધરવામાં આવી રહી છે.
નાયબ મુખ્યમંત્રી હર્ષ સંઘવીના નેતૃત્વ હેઠળ ગુજરાત પોલીસે મહિલાઓ અને બાળકોની સુરક્ષા વધુ મજબૂત બનાવવા તેમજ તેમની સામે થતા ગુનાઓના નિવારણ માટે સક્રિય પગલાં હાથ ધર્યાં છે.
રાજ્યના પોલીસ વડા જ્ઞાનેન્દ્રસિંહ મલિકના માર્ગદર્શન હેઠળ ગુજરાત પોલીસે સમગ્ર રાજ્યમાં એક મહિનાની વિશેષ ઝુંબેશ શરૂ કરી છે.
“19થી 23 ઓગસ્ટ દરમિયાન હાથ ધરાયેલી પ્રથમ સપ્તાહની કામગીરી દર્શાવે છે કે, પોલીસિંગ હવે માત્ર ઘટના બન્યા બાદની કાર્યવાહી સુધી સીમિત ન રહીને વધુ સક્રિય અને પીડિત-કેન્દ્રી અભિગમ તરફ આગળ વધી રહ્યું છે. ગંભીર ઘટનાઓ બને તે પહેલાં સંવેદનશીલતાઓને ઓળખવા પર વિશેષ ધ્યાન કેન્દ્રિત કરવામાં આવી રહ્યું છે,” સીઆઈડી ક્રાઈમ (વુમન સેલ), ગુજરાતના અધિક પોલીસ મહાનિર્દેશક અજય ચૌધરીએ જણાવ્યું હતું.
તેમણે વધુમાં જણાવ્યું હતું કે, “અભિયાનના ભાગરૂપે મહિલાઓ અને બાળકોની સુરક્ષાને લગતાં 525 સંવેદનશીલ સ્થળોનું મેપિંગ કરવામાં આવ્યું છે. આ કામગીરીથી પ્રાથમિક સ્તરનું વલ્નરેબિલિટી મેપ તૈયાર થશે, જેના આધારે પોલીસ એકમો એવા વિસ્તારોને ઓળખી શકશે જ્યાં કેન્દ્રિત દેખરેખ, નિવારક કાર્યવાહી અને નિયમિત મોનિટરિંગની જરૂરિયાત છે.”
અભિયાનના અન્ય મહત્વપૂર્ણ ઘટક તરીકે 436 સંવેદનશીલ પરિવારો અને વારંવાર ઘરેલુ હિંસાનો ભોગ બનેલા પીડિતોની ઓળખ કરવામાં આવી છે. આ કામગીરીથી આવા પરિવારો અને પીડિતો માટે લક્ષિત હસ્તક્ષેપ તેમજ સતત ફોલોઅપ માટેનો ડેટાબેઝ તૈયાર કરવામાં આવ્યો છે.
પ્રથમ સપ્તાહ દરમિયાન જાહેર સ્થળોની સુરક્ષા પણ અભિયાનનું મુખ્ય કેન્દ્ર રહી હતી. પોલીસે એવા જાહેર સ્થળોએ 1,033 સુરક્ષા ઓડિટ હાથ ધર્યાં જ્યાં મહિલાઓ અને બાળકો વધુ સંવેદનશીલ પરિસ્થિતિનો સામનો કરી શકે છે. આ ઓડિટનો હેતુ સુરક્ષા વ્યવસ્થામાં રહેલી ખામીઓને ઓળખી યોગ્ય નિવારક અને સુધારાત્મક પગલાં લેવાનો છે.
