લોર્ડ્સમાં ભારતીય ટીમની હાર બાદ રોહિત શર્મા અને વિરાટ કોહલી ફરી એકવાર ચર્ચામાં આવ્યા છે. મદન લાલ સહિત કેટલાક ભૂતપૂર્વ ક્રિકેટરોએ કોહલીને નિવૃત્તિનો નિર્ણય પાછો ખેંચવા કહ્યું છે. ઘણા મીડિયા અહેવાલોમાં, ઓસ્ટ્રેલિયા પ્રવાસ પછી રોહિત અને વિરાટ પર બોર્ડ અને ટીમ મેનેજમેન્ટ તરફથી ટેસ્ટમાંથી નિવૃત્તિ લેવાનું દબાણ હોવાની આશંકા વ્યક્ત કરી હતી. જોકે, હવે બોર્ડના ઉપપ્રમુખ રાજીવ શુક્લાએ સ્પષ્ટ કર્યું છે કે, એવું કંઈ નહોતું. તેમણે કહ્યું કે ટેસ્ટમાંથી નિવૃત્તિ લેવાનો નિર્ણય સંપૂર્ણપણે રોહિત અને કોહલી દ્વારા લેવામાં આવ્યો હતો અને બોર્ડ તરફથી તેમના પર કોઈ દખલ કે દબાણ નહોતું.
આ વર્ષની શરૂઆતમાં, ભારતને બોર્ડર-ગાવસ્કર ટ્રોફીમાં ઓસ્ટ્રેલિયા સામે 4-1થી હારનો સામનો કરવો પડ્યો હતો. ત્યારથી, તેમની નિવૃત્તિ અંગે ચર્ચા શરૂ થઈ હતી. BCCIની દખલગીરીની પણ ચર્ચા થઈ હતી. એવું પણ અનુમાન કરવામાં આવી રહ્યું હતું કે BCCI ટેસ્ટ ટીમમાં યુવાનોને લાવવાના પક્ષમાં છે અને બોર્ડે તેના અનુભવી ખેલાડીઓને નિવૃત્તિ લેવા કહ્યું હશે. જોકે, શુક્લાએ આ દાવાઓને નકારી કાઢ્યા હતા અને કહ્યું હતું કે નિવૃત્તિ લેવાનો નિર્ણય ખેલાડીઓનો પોતાનો છે. શુક્લાએ કહ્યું કે BCCI ભારતીય ક્રિકેટમાં કોહલી અને રોહિત બંનેના યોગદાનનો આદર કરે છે, પરંતુ કોઈ પણ ખેલાડીના કોઈ પણ ફોર્મેટમાંથી નિવૃત્તિ લેવાના નિર્ણયને પ્રભાવિત કરતું નથી. તેમણે સ્પષ્ટપણે કહ્યું કે બોર્ડ હંમેશા લાંબા ફોર્મેટમાં બે દિગ્ગજોની ખોટ અનુભવશે પરંતુ ODI સેટઅપમાં તેમની હાજરીની ઉજવણી કરવાનું ચાલુ રાખે છે.
શુક્લાએ કહ્યું, ‘હું કેટલીક બાબતો સ્પષ્ટ કરવા માંગુ છું. આપણે બધા રોહિત અને વિરાટની ગેરહાજરી અનુભવી રહ્યા છીએ, પરંતુ તેમણે પોતે જ ટેસ્ટમાંથી નિવૃત્તિ લેવાનો નિર્ણય લીધો. BCCI ની એક નીતિ છે કે તે ક્યારેય કોઈ ખેલાડીને કહેતી નથી કે ક્યારે અને કયા ફોર્મેટમાંથી નિવૃત્તિ લેવી. તે ખેલાડી પર નિર્ભર છે. તે તેનો પોતાનો નિર્ણય હતો. તેણે પોતાની રીતે નિવૃત્તિ લીધી. અમે હંમેશા તેની ખોટ અનુભવીશું. અમે તેને એક મહાન બેટ્સમેન માનીએ છીએ. સારી વાત એ છે કે તે ODIમાં ઉપલબ્ધ છે.’
