યુએસએમાં એવિયન ઈન્ફલ્યુએન્ઝા A (H5N1) વાયરસના કેસ સતત વધી રહ્યા છે. કેલિફોર્નિયાના અધિકારીઓના જણાવ્યા અનુસાર ઓગસ્ટથી અત્યાર સુધીમાં બર્ડ ફ્લૂની 984 ડેરીઓમાંથી 659 માં અસર થઈ છે. આમાંથી એક ચતુર્થાંશ કેસો છેલ્લા મહિનામાં જ નોંધાયા હતા. રાજ્યના ડેરી ઉદ્યોગમાં ઝડપથી ફેલાતા વાયરસને કારણે ગવર્નર ગેવિને ગયા અઠવાડિયે કટોકટીની સ્થિતિ જાહેર કરી હતી. કેલિફોર્નિયાના ગવર્નરે એક નિવેદનમાં જણાવ્યું હતું કે, આ સુનિશ્ચિત કરશે કે સરકારી એજન્સીઓ પાસે આ અભૂતપૂર્વ પરિસ્થિતિનો જવાબ આપવા માટે જરૂરી સંસાધનો છે. જેથી તેઓ પરિસ્થિતિનો ઝડપથી જવાબ આપી શકે.
રોગચાળાની માનવીય અસર વધુને વધુ ગંભીર બની રહી
યુએસ સેન્ટર્સ ફોર ડિસીઝ કંટ્રોલ (CDC) ના નવીનતમ અહેવાલ અનુસાર, આ રોગચાળાની માનવીય અસર વધુને વધુ ગંભીર બની રહી અને કેલિફોર્નિયામાં આવા 36 કેસની પુષ્ટિ થઈ છે. તે દેશના કુલ 65 કેસોમાંથી અડધાથી વધુ છે. કેલિફોર્નિયાના લોસ એન્જલસ કાઉન્ટી અને સ્ટેનિસ્લોસ કાઉન્ટીમાં સોમવારે બે નવા કેસની પુષ્ટિ થઈ હતી. બંને કાઉન્ટીઓના આરોગ્ય વિભાગના જણાવ્યા અનુસાર, બંને પુરુષો તેમના કાર્યસ્થળ પર બર્ડ ફ્લૂથી સંક્રમિત પ્રાણીઓના સંપર્કમાં આવ્યા હતા. બંને વ્યક્તિઓમાં વાયરસના હળવા લક્ષણો હતા અને તેમને એન્ટિવાયરલ દવાઓથી સારવાર આપવામાં આવી હતી.
2 અઠવાડિયે 1.7 મિલિયન ગાયોનું પરીક્ષણ કરવામાં આવી રહ્યું છે
જોકે આરોગ્ય અધિકારીઓએ જણાવ્યું હતું કે સામાન્ય લોકો માટે જોખમ ઓછું છે. આ વાયરસ 90 થી 100 ટકા ચેપગ્રસ્ત મરઘીઓ અને 1 થી 2 ટકા ગાયોને મારી શકે છે. કેલિફોર્નિયા રાજ્યના પશુચિકિત્સક એનેટ એમ. જોન્સે જણાવ્યું હતું કે સંક્રમિત ગાયો કદાચ ક્યારેય સંપૂર્ણ સ્વસ્થ થઈ શકશે નહીં. દેશનું સૌથી મોટું ડેરી ઉત્પાદક રાજ્ય કેલિફોર્નિયા બર્ડ ફ્લૂના પ્રકોપને કારણે ભારે આર્થિક નુકસાનનો સામનો કરી રહ્યું છે. અધિકારીઓએ જણાવ્યું કે રાજ્યમાં હવે દર અઠવાડિયે 1.7 મિલિયન ગાયોનું પરીક્ષણ કરવામાં આવી રહ્યું છે.
51 કોમર્શિયલ પોલ્ટ્રી ફાર્મ અને 9 ડોમેસ્ટિક પોલ્ટ્રી ફાર્મ પ્રભાવિત થયા
યુએસ ડિપાર્ટમેન્ટ ઓફ એગ્રીકલ્ચરના અહેવાલો અનુસાર નવેમ્બરમાં કેલિફોર્નિયાના દૂધનું ઉત્પાદન એક વર્ષ અગાઉની સરખામણીએ 9.2 ટકા ઘટ્યું હતું. જે અત્યાર સુધીનો સૌથી મોટો ઘટાડો છે. આનાથી રાષ્ટ્રીય દૂધ ઉત્પાદનમાં 1 ટકાનો ઘટાડો થયો અને અમેરિકન ડેરી ઉત્પાદનોની ઉપલબ્ધતા અને કિંમતોને અસર થઈ છે. રાજ્યના પોલ્ટ્રી ઉદ્યોગને પણ નુકસાન થયું છે. કેલિફોર્નિયા ડિપાર્ટમેન્ટ ઓફ ફૂડ એન્ડ એગ્રીકલ્ચરે અહેવાલ આપ્યો છે કે સમગ્ર રાજ્યમાં 51 કોમર્શિયલ પોલ્ટ્રી ફાર્મ અને 9 ડોમેસ્ટિક પોલ્ટ્રી ફાર્મ પ્રભાવિત થયા છે.
